یوٹیلٹی اسٹورز ورکر یونین نے ملک گیر احتجاج کا اعلان کر دیا ہے۔ ڈیلی ویجز ملازمین کی برطرفیوں کے خلاف ملک بھر میں احتجاج کیا جائے گا، جس کے تحت اسلام آباد ہیڈ آفس بلیو ایریا کے سامنے دوپہر دو بجے مظاہرہ ہوگا، جبکہ دیگر شہروں میں بھی احتجاجی مظاہرے کیے جائیں گے۔ موقر قومی اخبار کے مطابق، ورکر یونین کا کہنا ہے کہ اگر مطالبات تسلیم نہ کیے گئے تو دھرنا دیا جائے گا، اور احتجاجی تحریک اس وقت تک جاری رہے گی جب تک برطرف ملازمین کو بحال نہیں کیا جاتا۔ یوٹیلٹی اسٹورز ورکر یونین کے مطابق، تنظیم نو کے نام پر حکومت نے تین ہزار سے زائد ملازمین کو برطرف کر دیا ہے، جس سے ملازمین شدید اضطراب میں مبتلا ہیں۔ یونین نے اس فیصلے کے خلاف عدالت سے رجوع کرنے کا بھی اعلان کیا ہے۔ سیکریٹری جنرل نیشنل ورکرز یونین، راجہ مسکین کا کہنا ہے کہ ملازمین کی برطرفیوں کے خلاف این آئی آر سی میں کیس دائر کیا جا رہا ہے اور عدالت سے حکم امتناع کے لیے بھی رجوع کیا جائے گا۔ انہوں نے انکشاف کیا کہ برطرفی کے بعد ایک ملازم، جنید قریشی نے دلبرداشتہ ہو کر خودکشی کر لی، اور یونین اس واقعے کی ایف آئی آر حکومت اور انتظامیہ کے خلاف درج کرانے کی کوشش کرے گی۔ #utilitystores #protest #workersrights #zavianews