محارب🕊
June 8, 2025 at 07:30 PM
*ليه لازم تبدأ تبص لنفسك بجدية وصدق*
كل إنسان ممكن يعدي بتجارب مؤلمة أو مواقف تهز كيانه، مش شرط تكون صدمات ضخمة، لكن وجع صغير متكرر، تجاهل، لوم، ضغط، أو حتى دلع زايد.. وكل ده ممكن يكوّن جواك جرح، يفضل شغال في الخلفية وانت مش واخد بالك.
في وسط الرحلة دي، في ناس بتلجأ للهروب بشكل واعي أو لا واعي.. الهروب ده ممكن يظهر في التعلق، العلاقات المؤذية، الإنجاز المفرط، الأكل، أو حتى الإدمان. بس اللي تحت كل ده في الغالب وجع قديم، واحتياج ما اتحققش.
أنا كتبت البوست ده علشان أحط ضوء على جوانب يمكن ما بنتكلمش عنها كتير، أو بنحاول نبررها.
ودي بعض التوضيحات المهمة:
*الاستبصار مش لحظة*.. دي رحلة
محدش بيكتشف نفسه في جلسة واحدة. العلاج بياخد وقت علشان الشخص يفهم نفسه بعمق، يشوف الأحداث من زاوية أوسع مش من نظرته المشوهة بسبب ألمه أو معتقداته القديمة.
*مش بنسعى للكمال، بنسعى للفهم والتوازن*
العلاج النفسي هدفه إنك تبقى فاهم نفسك، شخصيتك، احتياجاتك، دوافعك.. وده بيساعدك تختار طريقك بشكل أنضج.
*التقبل مش ضعف ولا خضوع*
في فرق كبير بين إنك تعمل حاجة بإرادتك واقتناع، وبين إنك تمشي ورا كلام الأهل أو المجتمع لمجرد إنك عايز ترضيهم. القناعة الحقيقية بتيجي من جواك، مش من بره.
*النجاح الحقيقي بيحافظ على صحتك*
ساعات الإنجاز بيبقى وسيلة للهروب، مش للتعبير عن الذات. لو نجاحك بيكلفك نومك، صحتك، هدوءك، فده محتاج منك تقف وتسأل نفسك: "أنا بهرب من إيه؟"
*الاستقلال النفسي مش تمرد ده وعي*
ليه تبقى تابع لمجرد الخوف من الرفض أو اللوم؟ وجودك مش مرهون بقبول أهلك أو رأيهم. انت محتاج يكون ليك هويتك الخاصة وفكرك الواضح.
*الوعي بدون إدراك ممكن يؤذيك*
إنك تكون واعي ومش مدرك ده ممكن يخليك تستخدم معلوماتك ضد نفسك. لازم الاتنين يمشوا سوا.. وده اللي بيعلمه العلاج الجدلي السلوكي DBT من خلال موديولات زي "اليقظة الذهنية" وتنظيم المشاعر.
🤍وفي الآخر....مهم نفتكر إن كتير من مشاكلنا النفسية ليها جذور تربوية، من أهل ربّونا على قد وعيهم، بحبهم وبطريقتهم، حتى لو وجعونا.
لكن الحقيقة اللي بنغفل عنها أحيانًا، إننا دلوقتي بقينا بالغين.. ناضجين.. مسؤولين عن نفسنا وتعافينا.
أنت المسؤول عن نفسك، مش ضحية مستمرة للماضي.
*خد خطوة.. وابدأ رحلتك من دلوقتي.*
اطلب المساعدة، اقرأ، اتعلم، ودوّر على الناس الصح اللي يساعدوك.
لأن كلنا هنتحاسب لوحدنا.. مش عن غيرنا.
وكل عيد وأنتم بخير وسلام داخلي ووعي ناضج 🤍
