کچھ تصویریں شاہکار ہوتی ہیں ۔ سراپا حسن ۔ ان کی مٹھاس لاشعور میں ایسے اترتی ہے جیسے سورج کی کرن سیپ کے دل میں اترتی ہے۔ یہ ابھی ایک ایسی ہی تصویر تھی ۔ پاکستانی فوج دشمن پر میزائل فائر کر نے کی تیاری کر رہی تھی اور کچھ لوگ مزے سے پاس ہی پتھلڑ مار کر بیٹھے تھے۔ کوئی خوف نہیں تھا ، لا خوف علیھم ولا ھم یحزنون ۔ کیا سکینت تھی جو خدا نے ان پر اتاری تھی۔ یہ دیہاتیوں کے بیٹھنے کا ایک خاص انداز ہے ، دنیا سے بے فکرا انداز۔ ہم بھی ایسے ہی کبھی نہر کنارے بیٹھ جایا کرتے تھے کبھی سڑک کے کنارے۔ کتنی اپنائیت ہے اس تصویر میں ، جیسے دشمن پر میزائل صرف فوج نے نہیں بلکہ عوام اور فوج نے مل کر چلائے ہوں ۔