(أنا لسه والدة ولبني لسه مجاش....) أولاً: حمدًا لله على سلامتك إنتى والبيبي الجديد... ربنا يرزقك بره ويعينك على تربيته :) ثانيًا: اللبن جه ووصل وقاعد مستني من بدري حضرتك :D الثدي بيبدأ يكون لبن في الفترة الأخيرة من الحمل ومن قبل ما الولادة تحصل أصلا، وبيفضل في فترة تأهب لإن الولادة تحصل في أي معاد حتى لو معاد مبكر... بس اللبن مش بينزل تحت تأثير هرمونات الحمل، وأول ما بتحصل الولادة الهرمونات دي بتقل فجأة، فبيستعد اللبن للنزول... الفكرة بس إننا ممكن منشوفش اللبن أصلا... بس ده مش معناه إنه مش موجود... بس فيه حاجات كتير بتخلي اللبن ده مش متشاف لينا كويس... أول سبب هو إن لونه مش لون لبن... لبن الساعات الأولى اسمه بالعربي (لبأ) أو بالمصري (السرسوب) وبالانجليزي (Colostrum).. وده لونه ممكن يبقي شفاف أو لبني أو أصفر... أي حاجة بس مش أبيض :D معرفتكش أنا كده :P وده لإن تكوينه مختلف بشكل كبير عن اللبن اللي هيجي بعد كده... ببساطة هو عبارة عن جرعة مكثفة من البروتين والاجسام المناعية وشوية حاجات كده هي كل ما يحتاجه الطفل في الساعات دي... لأ والأحلى من كده بقى... إنه بيختلف من طفل لطفل حسب معاد ولادته وحالته الصحية... يعني حاجة تفصيل كده :D حاجة كمان بتخلينا منقدرش نشوف اللبن كويس، وهو إنه أول ما بينزل بيتبلع... مبيقعدش في فم الطفل أصلا عشان نشوفه جواه... فيه حاجة اسمها Suck-Swallow-Breathe Dynamics... ده ريفلكس الطفل مولود بيه وبيخليه اول ما يمص يبلع وبعدين ياخد نفس.. وطبعا ده بيكون منتظم ومستقر في الرضاعة الطبيعية المباشرة وبيتلخبط خالص في الببرونة اللي مش بتسمح للطفل يتحكم في العملية دي وبتلخبطهاله تمامًا، وتبوظ له بعد كده ميكانزم الرضاعة الطبيعية الحاجة التالتة اللي بتخلينا منقدرش نشوف لبن السرسوب هي إنه كميته قليلة جدًا... وزي ما قلنا بتتبلع على طول.. يعني مفيش مجال لإن حبة يدلدقوا من فم الطفل مثلا أو يكون فيه فايض إنتاج زايد يملا ثدي الأم ويحسسها بالامتلاء أو الثقل زي ما هيحصل بعد كام يوم كده وأمهاتنا بيسموها (هجمة اللبن) أو (milk came in) زي ما الصورة بتوضح... حجم معدة الطفل في أول يوم زي الكريزة أو البلية... هي حجمها كده، واللي هيملاها هما شوية اللبن اللي احنا مش شايفينهم دول.. وهيتهضموا بسرعة وهيرجع يرضع تاني بعد شوية قصيرين... فمش منطقي أبدًا إننا نتعامل مع معدة الطفل زي معدتنا ونبقي عايزينه ياكل 6 وجبات كبيرة وينام بعدها 6 ساعات مثلا زي ما بيحصل معانا! تخيل بقي يا بطل حجم المعدة دي لما تبقي هي من7:15 مللي... ونيجي احنا نهبدها رضعة لبن صناعي أو أعشاب أو جلوكوز 30 ملل... يعني ضعف حجمها!! والمعدة عضلة قابلة للتمدد... فلما نبدأ من أول يوم بإننا نضاعف حجم معدة الطفل من ضعفين ولحد أربع أضعاف كده، وبعدين نرجع نقول مبيشبعش ليه!؟! طب تفتكروا ليه؟! يعني اللي خلق طفلك باعت رزقه معاه وقاعد مستنيه متقلقيش :) هو بس مخلي حضرتك وصية على الأمانة دي توصليها لأصحابها :D -طيب بس هو بيرضع وبعدين بيقعد يعيط، يبقي طبعًا جعان! *لأ الحقيقة، فيه مشاعر سلبية كتير ممكن تخلي الطفل يعيط غير الجوع -لأ مشاعر إيه حضرتك ، ده بأقولك عنده يومين مش سنتين * أيوه أنا عارفة والله :D وعنده مشاعر واحتياجات ومتطلبات نفسية وذوق وتفضيلات غير الرضاعة ... إيه المشاعر والاحتياجات دي وإزاي نعرفها ونلبيها ونهدي البيبي من غير الاحتياج لببرونة اللبن والاعشاب والجلوكوز... بكره بإذن الله... فاصل ونواصل :) ** بعض المصادر عشان زملائنا الأطباء للاستزادة Suck-Swallow-Breathe Dynamics in Breastfed Infants http://www.ncbi.nlm.nih.gov/pubmed/26319112 Immune markers in breast milk and fetal and maternal body fluids: a systematic review http://www.ncbi.nlm.nih.gov/pubmed/21678611 د منار مبارز استشاري دولي الرضاعة الطبيعية