اسلام آباد: 29 مئی 2025 *پاکستان اور ایشیائی ترقیاتی بینک کا کاربن مارکیٹس کو سبز ترقی کے نئے افق کے طور پر اپنانے پر اتفاق* وفاقی وزیر برائے موسمیاتی تبدیلی و ماحولیاتی ہم آہنگی، ڈاکٹر مصدق ملک نے ایشیائی ترقیاتی بینک (ADB) کے ایک اعلیٰ سطحی وفد سے ملاقات کی، جس کی قیادت کلائمٹ چینج اینڈ سسٹین ایبل ڈیولپمنٹ کے سینئر ڈائریکٹر جناب تورو کوبو (Toru Kubo) کر رہے تھے۔ ملاقات کا مقصد کاربن مارکیٹس میں شراکتی امکانات کا جائزہ لینا اور ایک نئی ماحولیاتی حکمتِ عملی کی تشکیل کے لیے مشترکہ اقدامات کو فروغ دینا تھا، جو اقتصادی ترقی اور ماحولیاتی تحفظ کے درمیان ہم آہنگی کو ممکن بنائے۔ یہ ملاقات پاکستان کی قومی ماحولیاتی حکمتِ عملی کو بین الاقوامی معیارات اور مارکیٹ پر مبنی موسمیاتی مالیاتی حلوں کے ساتھ ہم آہنگ کرنے کی جانب ایک اہم پیش رفت ثابت ہوئی۔ دونوں فریقین نے اس امر پر اتفاق کیا کہ ایک جامع، ہم آہنگ اور مشترکہ ماحولیاتی حکمتِ عملی مرتب کی جائے گی، جس میں کاربن کریڈٹس کا حصول، ماحولیاتی جدت طرازی، اور نتائج پر مبنی منصوبوں کا نفاذ کلیدی ستون ہوں گے۔ ڈاکٹر مصدق ملک نے ADB کو مکمل سرکاری تعاون اور ذاتی سطح پر نگرانی کی یقین دہانی کرواتے ہوئے کہا کہ حکمتِ عملی کی تشکیل میں شفافیت، اثر انگیزی اور نتائج کی فراہمی کو ترجیح دی جائے گی۔ جناب تورو کوبو نے ترقی پذیر رکن ممالک کے لیے ADB کے تعاون کو اجاگر کرتے ہوئے کہا کہ بینک کم کاربن ٹیکنالوجی میں سرمایہ کاری کو فروغ دیتا ہے، کاربن فنانس کے لیے آمادگی بڑھاتا ہے، اور پاکستان جیسے ممالک کو بین الاقوامی کاربن مارکیٹس تک مؤثر رسائی میں معاونت فراہم کرتا ہے۔ ملاقات میں اس بات پر بھی تبادلہ خیال کیا گیا کہ پاکستان کس طرح پائیدار ترقی کے اہداف (SDGs) کو اپنی کاربن فنانس پالیسی سے ہم آہنگ کر کے ماحولیاتی اقدامات کو اقتصادی طاقت اور عالمی وقار میں تبدیل کر سکتا ہے۔ یہ ملاقات اس اعتراف کا مظہر ہے کہ ماحولیاتی موافقت اور تخفیف صرف ماحولیاتی ضرورت نہیں بلکہ اقتصادی ترقی کے مؤثر ذرائع بھی ہیں۔