رسالة إلى أحمد سعد من ش سالم أبوغالي بص يا أحمد، أنا مش هاتكلم عن الناس اللي فرحوا بتوبتك يوم ما أعلنتها في الحرم، جزاهم الله خيراً، أحسنوا الظن بك، وفرحوا برجوعك، ولو رجعت ميت مرة، هيفرحوا بيك تاني وتالت. ولا هاقف عند الشيوخ اللي كانوا معاك، واقول ياترى قالوا ايه ؟!، الله أعلم بالنوايا، وأعلم بما في الصدور. أنا مش جاي أعاتب، ولا أفتش في قلبك، أنا عايز أكلمك إنت، أكلم “أحمد سعد” اللي جواه فطرة، واللي متأكد إنه لسه فيه حتة حلوة، نقية، ربنا فَطَره عليها. 👈لو كنت فعلاً تبت، ففيه شروط للتوبة :الإقلاع عن الذنب، والندم عليه، والعزم ألا تعود إليه ، واللى انت عملته فى الساحل، وضحكك انت والجمهور للأسف ينافى التوبة والرجوع إلى الله .. وبصراحة حاجه تزعل أوى . 👈وإن كانت الحكاية كلها “تريند”، فدين ربنا مش مادة يتلعب بيها إياك تستهزئ بتوبة،أو بمعنى شرعى ولا تضحك على لحظة رجوع لربنا ربنا أنزل آيات فى اناس استهزؤوا بآياته: وَلَئِنْ سَأَلْتَهُمْ لَيَقُولُنَّ إِنَّمَا كُنَّا نَخُوضُ وَنَلْعَبُ قُلْ أَبِاللَّهِ وَآيَاتِهِ وَرَسُولِهِ كُنْتُمْ تَسْتَهْزِئُونَ * لَا تَعْتَذِرُوا قَدْ كَفَرْتُمْ بَعْدَ إِيمَانِكُمْ وأنا على يقين… إن دي مش نيتك يا أحمد، والله العظيم لا الشهرة هتنفعك، ولا الفلوس هتشفعلك، ولا الناس اللي حواليك فى الوسط بتاعك هينفعوك وانت واقف لوحدك قدام ربنا. أنا مش جاي أقولك “حرام” و”حلال”، ولكن سؤال واحد بس ..؟ ترضى تموت وإنت واقف على المسرح بتغني؟ ترضى تكون آخر لحظة في حياتك صوت موسيقى وهتاف جمهور؟ أكيد لا… النبي ﷺ قال: “الإثم ما حاك في صدرك، وكرهت أن يطلع عليه الناس”، وان كنت عامل حسابك إنك تتوب، وهيجى اليوم اللى ترجع فيه لربنا .. فمتزعلش منى 👇 التوبة مش زرار تضغط عليه فى الوقت اللى انت عايزه،وتتقبل فى الوقت اللى انت عايزه ، لان العُمر مش بإيدك… والموت مش بينتظر استعدادك. يا احمد العمر بيجري، وفجأة… تلاقي نفسك في القبر، وقتها هتتمنى لو ترجع تمسح كل أغنية، كل مشهد، كل كلمة، بس والله ما هتقدر. الناس اللي حواليك ممكن يصقفوا، لكن محدش هيشيل عنك، ولا حد هيسمعك لما تصرخ في ظلمة القبر. أنا خايف عليك، وخوفي مش طمع في مصلحة ولا شهرة وربى يعلم، ده خوف أحسبه صادق، من واحد بيحب لك الخير، وبيحب يشوفك ثابت، نقي، عزيز عند ربنا. يا أحمد… لسه في فرصة، ولسه القلب بينبض، وربنا بيفرح بتوبة عبده مهما طال غيابه، بس لو ضاعت الفرصة… ساعتها الندم مش هينفع فربنا يصلح حالك 💐