عید الاضحی کے موقع پر حضرت امیر شریعت کا پیغام اور ضروری ہدایات امیر شریعت بہار ،اڈیشہ ،جھارکھنڈ ومغربی بنگال حضرت مولانا احمد ولی فیصل رحمانی صاحب مدظلہ العالی و سجادہ نشیں خانقاہ رحمانی مونگیر نے عید الاضحی کے مبارک موقع پر مسلمانوں کے نام اپنے پیغام میں فرمایا کہ اضحیہ ( قربانی ) کا عمل اللہ تعالٰی کے نزدیک ان ایام میں سب سے پسندیدہ اور محبوب ترین عمل ہے، قربانی کی عبادت در حقیقت اپنے وجود کو رب کائنات کے سامنے سپرد کر دینے ،رضاء الہی کیلئے اطاعت وفرمانبرداری میں ان کے حضور سر نیاز خم کر دینے اور مکمل فنائیت کا نام ہے، یہی اصل میں عبدیت ہے،ہماری دعاء ہے کہ اللہ تعالی ہم سب کی قربانیوں کو قبول فرمائے ، عبدیت کا اعلی مقام مرحمت فرمائے اور ہماری عید کو مبارک بنائے۔ آمین حضرت امیر شریعت نے اپنے بیان میں یہ بھی فرمایا کہ اسی ماہ میں اسلام کا اہم رکن فر يضہ حج بھی ادا کیا جاتا ہے، لاکھوں بندگان خدا حج کے اعمال ادا کرتے ہیں اللہ تعالی ان کے حج کو قبول فرمائے اورتبدیلی احوال کا ذریعہ بنائے۔ حضرت امیر شریعت نے قربانی کے مبارک عمل کے تعلق سے ملک کے تمام مسلمانوں سے اپیل کرتے ہوئے مندرجہ ذیل اہم ضروری ہدایت دیں۔ ❖ قربانی شعائر اسلام میں سے ہے اور ہر صاحب نصاب پر واجب ہے۔ جانور کی قیمت کا ہدیہ کر دینے سے واجب کی ادائیگی نہیں ہوتی اس لئےقربانی ضرور کریں۔ ❖ اس موقع پر صفائی وستھرائی کا پورا خیال رکھیں، قربانی کے فضلات یعنی خون ، غلاظت ، اوجھڑی، ہڈی اور کھال وغیرہ محلے کی نالیوں میں نہ بہائیں اور کھلے میدان میں نہ چھوڑیں، بلکہ انہیں محفوظ جگہ پر دفن کریں تا کہ گندگی اور دوسروں کے لیے غلط فہمیوں کا سبب نہ بنے۔ ❖ قربانی عبادت ہے، اس لیے قربانی کی جگہ پر شور و ہنگامہ نہ کریں اور ہجوم نہ لگائیں۔ ❖ اگر قربانی کے جانور کی کھال کسی محتاج شخص یا مدرسے یا حقدار ادارہ میں دینے کی سہولت ہو تو ضرور دی جائے ، ورنہ چمڑا بیچ کر اس کی قیمت دی جائے۔ ❖ قربانی کے دنوں میں اس بات کا خاص خیال رکھیں کہ آپ کے عمل سے برادران وطن کو اذیت اور تکلیف نہ پہونچے۔ ❖ قربانی کے گوشت کو ضرورت مند بھائیوں ، رشتہ دار اور دوست احباب تک محتاط اور محفوظ طریقہ سے پہونچائیں۔ ❖ خون لگے ہوئے کپڑوں اور تھیلوں کے ساتھ باہر نہ نکلیں ۔ ❖ قربانی کھلی جگہ پر نہ کریں۔ ❖ سوشل میڈیا ، وہاٹس ایپ یا فیس بک پر جانوروں کے ذبح کی تصویر، ویڈیو وغیرہ اپ لوڈ یا شیر نہ کریں ۔ ❖ افواہوں پر دھیان نہ دیں اگر کسی طرح کا نا خوشگوار واقعہ پیش آئے تو فورا پولیس سے رابطہ کریں اور انتظامیہ کی مددکریں۔ ❖ سماج کے ذمہ دار افراد تمام معاملات پر خود نظر رکھیں اور اگر کوئی واقعہ پیش آئے تو امارت شرعیہ کو بھی اس نمبر پر 7903621729،.0612.2555351,2555668,.2555014,9431619558اس کی اطلاع دیں اور وہاں سے جو ہدایات دی جائے، ان پر عمل کریں۔ ❖ عید گاہ میں امام صاحب اپنی تقریر میں عید الاضحی کے فضائل و مسائل بالخصوص میدان عرفات میں دئے گئےرحمت عالم حضرت محمد صلی اللہ علیہ وسلم کے پیغام کو لوگوں تک پہونچائیں اور اس کے ساتھ مندرجہ بالا باتوں کی مصلیوں کو تاکید کر دیں بلکہ مناسب ہوگا کہ اسے پڑھ کر سنا دیں ۔ ❖ اللہ تعالیٰ آپ کی عید کو مبارک و مسعود اور خوشی و کامرانی کا ذریعہ بنائے اور قربانی کو قبول فرمائے، آمین!