بسم اللہ الرحمن الرحیم <مکتوب خادم> *مقام شکریہ* السلام علیکم ورحمة اللہ وبرکاته.. اللہ تعالی کی ”بے انتہا“ نعمتوں پر..اللہ تعالی کا ”بے انتہا“ شکر...الحمدللہ رب العالمین.. حضور اقدس حضرت محمد صلی اللہ علیہ وآلہ وسلم کا فرمان مبارک ہے: مَنْ لَم يَشْكُرِ النَّاسَ لَم يَشْكُرِ اللَّهَ (ترمذی) ترجمہ؛ ”جس نے (احسان کرنے والے) لوگوں کا شکریہ ادا نہیں کیا اس نے اللہ تعالی کا بھی شکر ادا نہیں کیا“ یہ حدیث مبارکہ الفاظ کے فرق کے ساتھ کئی روایات میں وارد ہوئی ہے..اور یہ ”حدیث صحیح“ ہے..اس اہم حدیث شریف کی تشریح بڑی دلچسپ ہے مگر فی الحال اس کا موقع نہیں..بس علم کے اس باب کا خلاصہ ان چند نکات سے یاد کر لیں.. (۱) اللہ تعالی اپنے بندوں سے یہ بات چاہتے ہیں کہ وہ اپنے ساتھ اچھائی، خیر، بھلائی اور احسان کرنے والوں کا احسان دل سے تسلیم کریں اور ان کا شکریہ ادا کریں.. (۲) شکریہ ادا کرنے کے تین راستے ہیں دو ضروری اور ایک حسب استطاعت (۳) دو ضروری طریقے یہ ہیں کہ....احسان اور بھلائی کرنے والے کے احسان اور بھلائی کو کھلے دل سے محسوس کرے..ایسا متکبر اور خود غرض نہ بنے کہ ہر چیز کو بس اپنا لازمی حق سمجھے بلکہ دوسروں کی بھلائی، خیر اور اچھائی کو اپنے اوپر ان کا احسان سمجھے...دوسرا ضروری کام یہ ہے کہ...احسان اور بھلائی کرنے والے کے لیے ”دعاء“ کرے..اور ”دعاء“ ایسی توجہ، محبت اور احسان مندی کے جذبہ سے کرے کہ اسے محسوس ہو کہ اس نے حق ادا کر دیا ہے..اور ساتھ ساتھ اپنی زبان سے اپنے محسن کو ”جزاک اللہ خیرا“ کہے..اللہ تعالی کے ”اہل شکر“ بندے رات کے آخری پہر تہجد میں..اپنے ”محسنین“ کے لیے دعاء کرتے ہیں..(۴) حسب استطاعت ”شکریہ“ یہ ہے کہ اگر وسعت اور استطاعت ہو تو احسان کا بدلہ اسی طرح کے..یا اس سے بہتر احسان کے ذریعہ دے..مگر اسمیں حساب کتاب نہ رکھے اور نہ اظہار کرے.. (۵) اللہ تعالی کے بندوں کا شکریہ ادا کرنے والے کو...اللہ تعالی کا صحیح شکر ادا کرنے کی توفیق ملتی ہے..اور جسے اللہ تعالی کے شکر کی توفیق مل گئی تو اس پر ”ہر جہان“ کی نعمتوں کے دروازے کھل جاتے ہیں..اور شکر گزار مؤمن..دنیا اور آخرت میں اللہ تعالی کے عذاب سے بچا لیا جاتا ہے.. ”مَا یَفْعَلُ اللّٰهُ بِعَذَابِكُمْ اِنْ شَكَرْتُمْ وَ اٰمَنْتُمْ وَ كَانَ اللّٰهُ شَاكِرًا عَلِیْمًا“ (النسا ۱۴۷) ترجمہ: اگر تم شکر گزار اور مؤمن بن جاؤ تو اللہ تعالی تمہیں عذاب دے کر کیا کریں گے اور اللہ تعالی قدر فرمانے والے جاننے والے ہیں.... آج اپنے کئی ”محسنین“ کا ”شکریہ“ ادا کرنے کے لیے ”مکتوب“ شروع کیا تھا..جو ”شکریہ“ کی فضیلت پر ہی مکمل ہو گیا..چلیں اسمیں خیر ہوگی..اب ”شکریہ“ اگلے مکتوب میں ان شاءاللہ.. والسلام خادم.....لااله الاالله محمد رسول الله *‏WhatsApp پر NIDA-E-HAQ چینل کو فالو کریں:* *https://whatsapp.com/channel/0029VavzmhD89innQQh24E3n*