Jis Shakhs Ki Gadhe Par Baithhne Ki Bhi Auqaat Na Ho, Us Ko Sar Par Bithha Dena Na Sirf BeWuqoofi Hai Balke Khud Apne *Waqaar, Izzat Aur Sukoon Ke Khilaaf E'laan E Jang* Hai. Kyun Ke Naa-Ahl Ko Maqaam Dena Wo Ghalati Hai Jo Ba'ad Me *Pachhtaawe Aur Takleef Ki Shakl* Ikhtiyaar Kar Leti Hai. Aise Log Na Shukr-Guzaar Hote Hain, Na Ahl, Aur Na Hi Wafa-Daar; Balke Wo Sar Par Baithh Kar Khud Ko Baadshaah Samajhne Lagte Hain Aur Usi Maqaam Ko Aap Ki Kamzori Samajh Kar Aap Hi Ke Khilaaf Iste'maal Karne Lagte Hain. Yaad Rakhen! Har Kisi Ko Izzat Dena Achchha Amal Zaroor Hai, Lekin *Had Se Zyaada Izzat Us Shakhs Ko Dena Jis Ka Zarf Chhota Ho, Izzat Ka Ziya Aur Ta'alluqaat Ka Zawaal* Hai. Is Liye Ta'alluqaat, Rutbe Aur E'temaad Ka Haq-Daar Sirf Wahi Ho Sakta Hai Jo In Sab Ki Qadr Jaanta Ho.