*صرف پانچ منٹ کا مدرسہ (قسط 249) :قرآن و حدیث کی روشنی میں* *ایک فرض کے بارے میں : نمازوں کا صحیح ہونا ضروری ہے* رسول اللّٰہ ﷺ نے فرمایا:" قیامت کے دن سب سے پہلے نماز کا حساب ہو گا، اگر نماز اچھی ہوئی تو باقی اعمال بھی اچھے ہوں گے اور اگر نماز خراب ہوئی تو باقی اعمال بھی خراب ہوں گے "۔ (ترغیب وترہیب :516،عن عبداللہ بن قرط رضی اللہ عنہ) ************************ *ایک سُنت عمل کے بارے میں : اللّٰہ سے رحم طلب کرنے کی دُعا* اللّٰہ تعالیٰ سے رحم و مغفرت اس طرح مانگے : *وَقُل رَّبِّ اغْفِرْ وَارْحَمْ وَأَنتَ خَيْرُ الرَّاحِمِينَ* اے پروردگار !میری مغفرت فرمائیے اور مجھ پر رحم فرمائیے کیونکہ آپ سب سے زیادہ رحم کرنے والے ہیں ۔ (سورہ مومنون:118) ************************ *ایک اہم عمل کی فضیلت : تین آدمیوں کی اللّٰہ نے ضمانت لی ہے* رسول اللّٰہ ﷺ نے فرمایا : "تین آدمیوں کی اللّٰہ نے ضمانت لے رکھی ہے ، اگر وہ زندہ رہیں تو بقدر ضرورت روزی ملتی ہے اور اگر وفات پا جائیں تو اللّٰہ تعالیٰ جنت میں داخل فرماتا ہے (ایک وہ ) جو گھر میں داخل ہوتے وقت سلام کرے تو اللّٰہ تعالیٰ اس کا ضامن ہے، (دوسرا وہ ) جو مسجد گیا تو اللّٰہ تعالیٰ اس کا ضامن ہے ، (تیسرا) اللّٰہ کی راہ میں نکلنے والے کا اللّٰہ تعالیٰ ضامن ہے"۔ (صحیح ابن حبان :500،عن ابی امامہ رضی اللہ عنہ) ************************ *ایک گناہ کے بارے میں : پڑوسی کو تکیلف دینا* رسول اللّٰہ ﷺ نے فرمایا :" جس نے اپنے پڑوسی کو تکلیف دی ، اس نے مجھے تکلیف دی اور جس نے مجھے تکلیف دی ، اس نے اللّٰہ کو تکلیف دی ۔ اور جس نے اپنے پڑوسی سے جھگڑا کیا ، اس نے مجھ سے جھگڑا کیا ، اور جس نے مجھ سے جھگڑا کیا ، تو اس نے اللّٰہ تعالیٰ سے جھگڑا کیا "۔ (الترغیب والترہیب:3649، عن انس بن مالک رضی اللہ عنہ) ************************ *دُنیا کے بارے میں : دُنیاوی خواہشوں کو پورا کرنے کا انجام* رسول اللّٰہ ﷺ نے فرمایا :" جو شخص دُنیا میں اپنی خواہشوں کو پورا کرتا ہے ، وہ آخرت میں اپنی خواہشات کے پورا کرنے سے محروم ہوتا ہے "۔ (بیہقی فی شعب الایمان :9390،عن البراء بن عازب رضی اللہ عنہ) ************************ *آخرت کے بارے میں : جنت کے خادم* قرآن میں اللّٰہ تعالیٰ فرماتا ہے :" (شراب کے جام لے کر) جنت والوں کی خدمت میں ایسے لڑکے دوڑتے پھریں گے جو ہمیشہ لڑکے ہی رہیں گے ، (وہ اس قدر حسین و خوبصورت ہیں کہ (جب تم انہیں دیکھو گے ، تو ایسا محسوس ہو گا کہ وہ بکھرے ہوئے موتی ہیں ، جب تم اس جگہ کو دیکھو گے ، تو بکثرت نعمت اور بڑی سلطنت دکھائی دے گی "۔ (سورہ دھر : 19تا 20) ************************ *طب نبوی سے علاج : زکام کا فوری علاج نہ کیا جائے* رسول اللّٰہ ﷺ نے فرمایا :" ہر انسان کے سر میں جذام (کوڑھ) کی جوش مارنے والی ایک رگ ہوتی ہے ۔جب وہ جوش مارتی ہے ، تو اللّٰہ تعالیٰ اس پر زکام مسلط کر دیتا ہے ، لہٰذا زکام کا علاج مت کرو"۔ (مستدرک :8262،عن عائشہ رضی اللہ عنہا) فائدہ: حکماء حضرات بھی زکام کا فوری علاج بہتر نہیں سمجھتے ،بلکہ کچھ دنوں کے بعد علاج کرنے کا مشورہ دیتے ہیں۔ ************************ *نبی کریم ﷺ کی نصیحت* رسول اللّٰہ ﷺ نے فرمایا :" جو اللّٰہ تعالیٰ اور آخرت کے دن پر ایمان رکھتا ہو اسے اپنے پڑوسی کا اکرام کرنا چاہیے۔صحابہ کرام رضوان اللہ علیہم اجمعین نے پوچھا :یا رسول اللّٰہ ﷺ! پڑوسی پر کیا حق ہے؟ فرمایا : اگر وہ تم سے کچھ مانگے تو اس کو دے دیا کرو"۔ (الترغیب والترہیب :3657،عن ابی ہریرہ ررضی اللہ عنہ)