https://www.facebook.com/100044589066824/posts/pfbid0RcHdUJMnWBoUvcSqHqut4jNf9wAZYMWNnEPkbwxbXqt1pD5qbAqXnSzecnwmNkqdl/?mibextid=CDWPTG 🔴 Kaminuza y'Uburundi : Agatotezo karabandanya ku munyeshure Tonny Irankunda ! Ibiri muri Kaminuza y'Uburundi ni akayoberabahinga. Tumaze imisi tubaha amarorerwa akorwa n'imboberakure zitwa ko zijejwe umutekano muri Kaminuza y'Uburundi, canecane Campus Mutanga. Mu ndwi iheze twabasangije amakuru y'ivyashikiye umunyeshure Tonny Irankunda, délégué wa Bac III mu gisata cigisha ubumenyeshamakuru (journalisme). Mw'ijoro ryo ku 12-13.5.2025, mu gihe yari yicaye hafi y'icuma kibafasha kuronka internet muri Tropicana II, kiri no hafi y'icumba ciwe, Tonny yabonye haza Imbonerakure zibiri zimutegeka kuja kuryama. Nawe azishura ko kazi zikora we yagakoze zitaranaza muri Kaminuza. Bihera ngaho, Imbonerakure zishaka gukubita Tonny, nawe arivuna, anatabaza abandi banyeshure, barashwabaduka. Ibintu vyahavuye bikomerera Tonny Irankunda kuko uwuserukira abanyeshure yabonye akaryo ko kumwihora, aca aramupfungisha. Iryo joro, Tonny Irankunda yariraye mu gasho ka zone Bwiza. Tonny Irankunda we nyene asanzwe ari Imbonerakure, yahoze ijejwe "GUKOSORA" (ni ukuvuga gukubita) abandi banyeshure, mu gihe c'ubuserukizi bw'abanyeshure bwariho imbere y'ubutwara ubu. Mubo Tonny Irankunda yakubise agihambaye, harimwo uwitwa Simon Bazirutwabo, nawe nyene yari asanzwe mu mbonerakure zikora amabi muri Kaminuza. Muri 2023, Simon Bazirutwabo yatowe kuba représentant général des étudiants, aca arakura bamwe bose bagize uruhara mw'ikubitwa ryiwe. Mu ndwi iheze, Simon Bazirutwabo yaronse akaryo ko kubeshera Tonny Irankunda ko ariko ahungabanya umutekano wa Kaminuza muri kino gihe c'amatora. Yapfuye kubiha Colonel Gaston Uwimana batazira Daruwesi ajejwe umutekano muri Kaminuza, uyo nawe aba arajanye Tonny mu gasho mu Bwiza ! 🔴 Tonny Irankunda yagirizwa ko yarondeye ubutabazi muri FOCODE ! Abanyeshure barababajwe n'akarenganyo Tonny Irankunda yakorewe, baradutabaza bukeye. Twapfuye kwandika ivyashikiye uyu munyeshure, birakwira hose ingene ariko ararenganywa, uwo musi nyene yaraye arekuwe. Ariko abamupfungishije bo barababaye babonye apfunguruwe, baca barondera kwongereza kumuremeka inteba ishushe. Mu mwanya wa mbere, Tonny Irankunda yagirijwe ko ariwe yandikiye FOCODE asaba gutabarizwa. Ubwo nyene, telefone yiwe yaciye ifatwa, imara imisi mu minwe ya Colonel Gaston Uwimana. Ntaco bayisanzemwo. Ku musi wa mbere uheze (19.5.2025), Tonny yarasubijwe telefone. Yibajije ko biheze. Kuva ejo haheze, Tonny Irankunda yatanguye kuronka imitahe (convocation) imuhamagara kwitaba igipolisi muri zone Rohero. Bagenziwe basubiriye kumutabariza kubera batewe umutima uhagaze n'ibiriko birashikira Tonny Irankunda. Ntibumva ingene ibibazo bibereye mu kigo ca Kaminuza, uwari yafashwe akaba yararekuwe, biriko birafata uwo murindi mu gipolisi. Babinomwa inzigo y'abashaka kugirira nabi uyu munyeshure. 🔴 Tonny Irankunda ntiyigeze atabaza FOCODE. Igihe Tonny Irankunda atabarizwa, yari mu gasho, nta telefone yari afise. Mu ntango, bagenziwe bamutabarije batazi n'iyo apfungiwe. Abatwandikiye ni abanyeshure bashika kuri batandatu. Bamwe bari abagenzi biwe, abandi bari abo bigana, abandi si n'imbonerakure, ariko barababajwe n'akarenganyo Tonny yakorewe. Bamwe mu bamuzi batwandikiye ko batangaye dutabarije Tonny Irankunda kubera bamuzi n'imboberakure yanka cane runo rubuga. Yoba ari mu bahoze batukana cane kuri runo rubuga, yoba yarafatiwe ibihano ico gihe. Abariko baramubeshera babihagarike. Ntaco ahuriyeko na FOCODE. Uko twamutabarije nuko twotabariza Simon Bazirutwabo mu gihe yogirirwa nabi. Muri FOCODE ntiducagura uwo dutabaza, n'abatugwanya bikomeye turabatabiriza mu gihe babangamiwe. Akarorero twatanze kuri Général Bunyoni karakwiye kugira ntihagire uwuzobesherwa ko akorana na FOCODE kubera imutabarije. Na Evariste Ndayishimiye tuzomutabariza hageze.