https://www.facebook.com/share/v/195vZpn8Pi/ Imyaka 10 yaraye irumanye umukuru w'umugambwe UPD-ZIGAMIBANGA, Zedi Feruzi, agandaguwe. Hari ku mugoroba w'uwa 23.5.2015, hafi isaha imwe y'ijoro. Zedi Feruzi yari avuye ku biro vy'umugambwe mu Ngagara, atera ataha ku rugo rwiwe. Ntirwari kure cane y'ingoro, ni nayo mpamvu yahagiye n'amaguru. Zedi yari kumwe n'abapolisi babiri bamucungera ubuzima, Éric Bigirimana na Ezéchiel Ndayisaba, be n'umushoferi wiwe, Pacifique Nshimirimana. Ari hafi gushika y'urugo rwiwe, Zedi Feruzi yahuye n'umumenyeshamakuru Jean-Baptiste Bireha, bararamukanya, baba nk'abavugana. Ako kanya haza voiture Toyota TI, yarimwo abapolisi bo muri API, umushoferi wa Zedi amera nk'uwuduza amaboko, amasase aca aratangura. Zedi Feruzi yaguye bwarumye aho mw'ibarabara, co kimwe n'umupolisi Éric Bigirimana. Jean-Baptiste Bireha na Ezéchiel Ndayisaba bwarakomeretse bikomeye. Wa mushoferi Pacifique Nshimirimana we nta na kimwe yabaye. Yaciye yiruka muhira kwa Feruzi, asambagura ibintu arondera ama "documents" atamenyekanye, aca afata imodoka ya Feruzi arayisohora, aca arigira. Mu kanya gato, Pacifique Nshimirimana yari ashitse mu Kigobe i muhira kwa Ferederiko Bamvuginyumvira, yari icegera c'umukuru wa FRODEBU, ashika amusaba ko yonyaruka kuraba aho bahejeje kurasira umugenzi wiwe Zedi Feruzi. Biboneka ko hoba hariho umugambi wo kujaniranya Zedi Feruzi na Frédéric Bamvuginyumvira. Bamvuginyumvira yaranse kugenda. Wa mushoferi yaciye ajana imodoka ya Zedi Feruzi mw'iperereza. Abishe Zedi Feruzi bari abapolisi bacungera umutekano wa Prezida Nkurunziza. Muri bo hamenyekanye Brigadier Jonas Ndabirinde na brigadier Jean Nimenya batazira Ruhindigiteri. Imodoka ibatwaye yaciye ibanyarukana ku ngoro ya CNDD-FDD, mu gihe bari bahejeje kwica Zedi Feruzi. Imyaka 10 iraheze ata butungane. Mukurikire intahe y'umumenyeshamakuru Jean-Baptiste Bireha yarokotse muri ico gitero. 📷 Ireresi ya Télé Renaissance.