https://www.facebook.com/share/p/15djLFEDyG/ 🔴 #amatora Aya niyo mashusho ahambaye y'ibiriko biraba uyu mwaka... Amatora yimirije ni inkinamico. Umugambwe ugira kabiri mu gihugu ntiwemerewe kwitoza. Umurwi CENI ntiwizewe na gatoya. Nta nderetsi zigenga vy'ukuri zizoyakurikirana. Iterabwoba mu banyagihugu rirarenze. CNDD-FDD izokwiha amajwi ishaka. Mu ncamake nta matora ariho, umurundi siwe azihitiramwo abamuserukira, ahubwo CNDD-FDD niyo izishiriraho abayiserukira. Ikibazo conyene gisigaye ni ukumenya uruhande ruzoba rukomeye hagati y'abo kwa Ndayishimiye n'abo kwa Ndikuriyo (ari nawe ahagarariye abo mw'iragi rya Nkurunziza). Ni naho bikenewe gukurikira aya masanamu abiri azoba yaranze aya matora : Njelina na Gerevazi. 🔴 Ndirakobuca, umugumyabanga akunzwe muri kino gihe... Inyuma y'indwi zibiri ashizwe mu zabukuru hataragera, Lieutenant-Général Gervais Ndirakobuca ubu yambaye umwambaro wa CNDD-FDD. Naho intonde zitaraja ahabona, vyitezwe ko ashobora kuba Ku rutonde rw'abitoza mu bukanguzamateka. Hari n'abakeka ko ashobora kuba umukuru w'Inama Nshingamateka. Igiharuro ca Ndayishimiye ni kimwe : kwigizayo umukeba akomeye, mu bwenge bwinshi, atamumaramaje. Gervais Ndirakobuca niwe mugumyabanga akundwa cane muri kino gihe mu banywanyi ba CNDD-FDD. Ni benshi badatinya kuvuga ko ariwe abereye kuba umukuru w'igihugu, mu kibanza ca Ndayishimiye. Benshi bafatira ku majambo menshi Ndayishimiye avuga, bakarindira ingiro bakabura. Birazwi ko hari vyinshi Ndayishimiye na Ndirakobuca batabona kumwe, na canecane ikibazo c'igitoro cabaye akanabirabahinga. Gervais Ndirakobuca yarerekanye inzira vyari gucamwo igitoro kikaboneka. Ariko iyo nzira yaca ibangamira inyungu za Ndayishimiye. Abarundi bari gukora, Ndayishimiye yari guhomba. Hako ariwe ahomba, Ndayishimiye yahisemwo amarira y'abarundi bose. Aho niho havuye urwanko, umushikiranganji wa mbere arakwa ijambo, asigara ari igikanganyoni. Ubu biragoye ko Ndirakobuca yokwerekana ico yamaze nk'umushikiranganji wa mbere. Ariko niwe akundwa, benshi bafata ko yabohewe amaboko i mugongo. Hari benshi muri CNDD-FDD bakunda imvugo idaca ku ruhande akoresha iyo aramutse avuga. Bamwe bamwipfuriza ko ariwe yohabwa kurongora umugambwe CNDD-FDD, akanitoza mu matora y'umukuru w'igihugu ya 2027. Ndayishimiye niyaramuka amuhaye gutwara Inama Nshingamateka, aharura inyungu zibiri. Ku ruhande rumwe aramukuye burundu mu bashobora guha amategeko ingabo. Ubu Ndirakobuca nta coup d'État yoshobora gukora. Uwutwara Inama Nshingamateka aragira icubahiro ariko nta nguvu aba afise yo kubangamira Umukuru w'igihugu. Ubuho abakenguzamateka kazoba akarwi gato cane kubera intara zigabanutse. Birazwi cane ko Gerevazi Ndirakobuca na Reveriyano Ndikuriyo ari akadasohoka. Kuva Ndikuriyo ahatswe guhitanwa n'ingwara itangaje, Ndayishimiye aguma acunze cane ico abo bagabo babiri bategura kumukorera. Bukebuke, agenda arabaka inguvu. Boba nabo bazoshobora kwivyukiranya ? Nabo nyene baracafise inguvu. 🔴 Umukenyezi wa mbere w'umukuru w'igihugu adatinya kwerekana ko akeneye ubutegetsi ! Nta mupfasoni w'umukuru w'igihugu yari bwigere agira uruhara rukomeye mu Burundi nka Angelina Ndayishimiye. Niwe wenyene yerekanye ingene ahahamiye ivyubahiro, ubutegetsi n'ubutunzi. Ntatinya na gatoya kwerekana ingene akunda ibintu bizimvye. Ku musi umwe arambara ibintu biciye imiliyoni ziri hagati y'ijana n'amajana abiri, bukeye agahindura uko nyene, ntihagire ico bimubwira mu gihugu cugarijwe n'ubukene. Ni umukenyezi aha amategeko abashikiranganji bigakunda, ku buryo abashikiranganji ba mbere Bunyoni na Ndirakobuca bose vyabananiye ingene bamugenza. Niwe wenyene avugwa ko ashobora guhindura mw'ijoro ingingo ziba zaraye zifunditswe n'abatwara igihugu. Niwe mukenyezi w'umukuru w'igihugu mu Burundi avugwa ko ashobora gutanga amategeko ku bakozi bo mw'iperereza. Ico ashatse kiraba. Niwe mukenyezi w'umukuru w'igihugu mu Burundi amaze kuvugwa ko yubahutse gutabura décret yasinywe n'umukuru w'igihugu. Hari imigambi yokozwe na Leta ahindukiza, na canecane iyifise imfashanyo zikomeye ziva hanze, akayigira iyo mw'ishirahamwe ryiwe canke ikaja mu biro iwe. Ni nde yomuvuguruza ? Muri aya matora, Angeline Ndayishimiye arafata ijambo mu myiyamamazo nk'uko aboneka kuri iyo foto. Musazawe ata na kimwe azwimwo muri politike, inyuma y'amatora azoba ari umushingamateka. Njelina ntatinya gushira imbere umuryango wiwe, kurusha nuko umugabo abikora. Njelina yoba azogera aho wenyene yubahuka gufata icicaro ca politike nkuko bamwe n'abandi babikeka ? Yoba azubahuka kurondera gutwara umugambwe CNDD-FDD ? Yoba nawe afise intumbero yo kuzoba umukuru w'igihugu, inyuma y'umugabo wiwe ? Hari benshi bamugereranya n'umupfasoni wa Robert Mugabe yahoze atwara Zimbabwe, Grace Mugabe bari bataziriye Grace Gucci kubera gukunda inyambaro zizimvye, na canecane iza Gucci. Grace Gucci yahavuye agera aho ahangana n'abahoze basangiye urugamba n'umugabo wiwe, arondera gutwara igihugu, birangira akwegeye Robert Mugabe. Imyambaro ya Gucci yo n'uwundi wo mu Burundi barayihuriyeko cane. None Angelina (Gucci ?) nawe yoba azubahuka guhangana icese n'ibindi bihangange vyo muri CNDD-FDD ? Ico bikoze, Angelina (Gucci ?) Ndayishimiye niwe muntu ashoboye guhuza abanywanyi ba CNDD-FDD n'abatavuga rumwe n'ubutegetsi mu kwiyamiriza amwe mu mabi akorwa n'intwaro ya Ndayishimiye. 🔴 Gerevazi canke Njelina, ni nde azobandanya runo rugendo kugeza kure ? Gerevazi Ndirakobuca, umugabo yahoze ajugumiza igihugu nka #ndakugarika yoba ajanywe kuruhuka muri "garage" canke agiye kwitegurira bikomeye ? Angelina, umukenyezi ataco atinya, yoba yiteguriye ikibanza gikomeye muri politike ? Umwanya niwo nyishu.