حکیم الامت حضرت مولانا اشرف علی تھانوی رحمۃ اللہ علیہ کے ملفوظات ومواعظ سے متعلق سید سلیمان ندوی رحمہ اللہ کی ہدایات (تحریر منقولہ از مکاتبت سلیمان ص 155): سلوک سلیمانی کے مرتب جناب پروفیسر محمد اشرف خاں صاحب تحریر فرماتے ہیں: نگاہ سلیمانی ؒ میں ان کی( حکیم الامت حضرت تھانویؒ کے ملفوظات ومواعظ کی) اتنی قدروقیمت تھی کہ میری پہلی حاضری کے وقت استفسار فرمایا: ’’آپ نے مولانا تھانویؒ کے ملفوظات ومواعظ پڑھے ہیں؟". راقم نے نفی میں جواب دیا تو فرمایا: ’’ملفوظات ومواعظ پڑھئے، وہاں ہر چیز اندر سے پھوٹ کر نکلی ہے‘‘. متعلقین ومنتسبین کو بکثرت ان کے مطالعہ کی تاکید فرماتے تھے. ایک صاحب سے جنہیں فقیر کے سامنے راولپنڈی میں بیعت فرمایا تھا، ارشاد فرمایا کم ازکم ساٹھ یا ستر مواعظ مطالعہ فرما لیجئے. اس سلسلہ میں حضرت والا ؒ کے مکتوبات کے بعض اقتباسات نقل کئے جاتے ہیں، جن سے ان مواعظ وملفوظات کی اہمیت ظاہر ہوگی، شاید اس سے کسی طالب حق کو فائدہ پہنچے. (1) ’’مولانا تھانوی رحمہ اللہ تعالیٰ کے مواعظ وملفوظات کا مطالعہ ضرور کیا کریں، بیحد منافع اور علم صحیح اللہ تعالیٰ عنایت فرمائیں گے اور تمیز حق وباطل عطا ہوگی". (2) ’’ان کتابوں (ملفوظات ومواعظ اور انفاس عیسیٰ ) کا بغور بغرض استفادہ مطالعہ انشاء اللہ تعالیٰ مفید عمل، محرک عمل اور مثمر برکات ہوگا‘‘. (3) ’’اگر آپ حضرت تھانویؒ کے مواعظ پڑھا کریں تو اس سے سب مرحلے طے ہوں گے‘‘. (4) ’’اگر کسی زندہ کی صحبت حاصل نہ ہوسکے تو حضرت تھانویؒ کے مواعظ اور ملفوظات دیکھا کریں، اور بری صحبت سے پرہیز کریں انشاء اللہ تعالیٰ صحبت کے فوائد حصل ہوں گے‘‘. (5) ’’اگر آپ دین کا صحیح فہم حاصل کرنا چاہیں تو حضرت مولانا تھانویؒ کے ملفوظات مطالعہ فرمائیں. اس کام میں مجھ سے جو امداد ہو سکے گی انشاء اللہ وہ ضرورہوگی. بے جان نماز میں جان پڑ جائے گی انشاء اللہ پہلے آپ ان کتابوں کے مطالعہ سے دین کا صحیح فہم پیدا کریں‘‘. (6) ’’آپ مواعظ اور ملفوظات تو ضرور ہی پڑھیں اور کوشش کرکے پڑھیں ہمت اور کوشش کے بغیر دین کی راہ بھی طے نہیں ہوسکتی‘‘. (7) ’’اللہ تعالیٰ آپ کی حفاطت فرمائے، ملفوطات اور مواعظ سے جو ملے اس کو مطالعہ کریں، کم ازکم چالیس پچاس وعظ پڑھ لیں‘‘. (8) ’’آپ حضرت تھانویؒ کی کتابوں میں سے پہلے قصد السبیل، پھر تعلیم الدین پڑھئے. اور حضرت کے جس قدر مواعظ وملفوظات مل سکیں، مطالعہ کرتے رہیں‘‘. (9) ’’حضرت مولانا تھانویؒ کے مواعظ کم ازکم ایک سو پڑھیں، اس کے بعد استفسار مزید فرمائیں، تعلیم الدین کو بار بار مطالعہ کی خاطر نہیں، بلکہ عمل کی نیت سے پڑھیں اور عمل پر دھیان دیں‘‘. (10) ’’آپ حضرت والا رحمۃ اللہ علیہ کی تصانیف کو دیکھا کریں اپنے عیوب ونقائص کا پتہ چل جائے گا اور ان کا علاج بھی معلوم ہوگا. انفاس عیسٰی مطالعہ میں رکھئے بڑی عجیب کتاب ہے‘‘. (11) ’’جی ہاں حضرت والا رحمۃ اللہ علیہ کے ملفوظات و تالیفات کے مطالعہ سے نئی قوت پیدا ہوگی، دس پندرہ منٹ بھی غنیمت ہیں‘‘. (12) ’’آپ حضرت والا رحمۃ اللہ علیہ کی تصنیفات ومواعظ پڑھا کریں یہ خود قائم مقام صحبت ہیں‘‘. (13) ’’خوشی ہوئی کہ قصد السبیل کو آپ نے پڑھ لیا، اور مواعظ کا مطالعہ کررہے ہیں. مواعظ وملفوظات کا مطالعہ مثمرِ برکات اور باعث ترقیات ہے‘‘. (14) ’’ہمارے حضرت ؒ (حکیم الامت حضرت تھانویؒ) کی تصانیف میں سے جس قدر مواعظ وملفوظات ملیں مطالعہ کیجئے، ان میں سے التکشف اور شرح دیوان حافط پڑھئے‘‘. (15) ’’حضرت مولانا تھانوی رحمۃ اللہ علیہ کے مواعظ وملفوطات کا مطالعہ رکھیں اس سے انشاء اللہ تعالیٰ کشف حجابات ہوگا، اور سلوک کی سیدھی راہ معلوم ہوگی، اور استقامت میں بڑی مدد ملے گی‘‘. (16) ’’حضرت تھانویؒ کے مواعظ ورسائل کا مطالعہ اکسیر ہے‘‘. (17) ’’مولانا تھانویؒ کی تصانیف کا مطالعہ جاری رکھیں یہی ہمارے یہاں طریقۂ فیض ہے‘‘. (18) ’’مواعظ وملفوظات کے مطالعہ کی مداومت ہر مرض کے لئے اکسیر ہے اور روحانی ترقی کی کامیاب تدبیر ہے. (19) وہاں (یعنی بصرہ) جانا مبارک ہو. خدا کرے کہ دنیا کے ساتھ دین کا بھی فائدہ ہو، اس کے لئے بہتر ہے کہ حضرت والا ؒ کے کچھ مواعظ ورسائل ساتھ لیتے جائیں اور مطالعہ میں رکھیں‘‘. (20) انفاس عیسیٰ کے متعلق ارشاد فرماتے ہیں: ’’یہ ہمارے مطب کا قرابادین ہے‘‘. اور اس ناکارہ سے تو آخر میں فرمایا تھا: ’’کہ اسے دیکھ کر اپنا علاج کیا کریں ‘‘. یہ چند اقتباسات اسی محتاط قلم کے ہیں جس کی علمی دیانت مسلمہ ہے. ان سے مواعظ وملفوظات اشرفی کی افادیت کا اندازہ ہو سکتا ہے. یہ مواعظ وملفوظات طرز ادا کی خوبی تاثیر و دلپذیری کے لحاظ سے نئے طبقہ کے لئے بھی اتنے ہی نافع ہیں جتنے پرانے طبقے کے لئے، اللہ تعالیٰ امت کو ان سے استفادہ کی پوری توفیق نصیب فرمائے. آمین. (ماخوذ از سلوک سلیمانی 1/446)