زورگریں لشکر ءِ پانزدہ کارمند کشتگ ءُ نُھ سرمچار شھید بیتگ۔ بی ایل اے Jun 11 , 2025 آشوب نیوز بلوچ لبریشن آرمی ءِ جارکش جیئند بلوچ ءَ ماں رسانکدر ءَ وتی شنگ کرتگیں درشانے ءَ گوشتگ کہ دو جون ءَ دوشمبے ءِ روچ ءَ بولان ءِ ھند مچ ءَ زورگریں پاکستانی لشکر ءُ بی ایل اے ءِ سرمچار ھما وھد ءَ دیم پہ دیم بیتگ اَنت کہ سرمچار گل ءِ کارے ءِ درچ ءَ سپر ءَ بیتگ اَنت. گونی پرا ءِ دمگ ءَ بی ایل اے سرمچار ءُ زورگریں پاکستانی لشکر ءِ میان ءَ میڑ بندات بیتگ، ھمے میان ءَ زورگریں لشکر ءِ کمانڈو گوں ھیلی کاپٹر ءَ دمگ ءَ ایر کپتگ اَنت ، داں باز اَداراں برجاھیں میڑ ءَ دژمن ءِ کم چہ کم ھشت کارمند مرتگ ءُ بی ایل اے ءِ پنچ سرمچار سنگت وژدل پنام ءِ مش مار ، سنگت سمی الله پنام ءِ سگار ، سنگت شیریار پنام ءِ چئیرمین ، سنگت سجاول پنام ءِ چیده ءُ سنگت نادر پنام ءِ چراگ شھید بیتگ اَنت. جارکش ءَ گوشتگ کہ سنگت وژدل پنام ءِ مش مار ء لال ھان سمالانی ، بولان ءِ ھند سنجاول ءِ جھمنند اَنت ، بیست سالی ئیں وژدل 2024 ءَ گوں بی ایل اے ءَ بندوک بیتگ ءُ گوں کسانیں اُمر ءَ دژمن ءِ بگیری ءَ تُپنگ چست کرتگ ءُ راجی زمہ واری ءِ کول ئِے کرتگ ، آئی ءَ بولان ءِ سنگراں باز رند ءَ مزنیں کرد پیلو کرتگ ءُ گڈسر ءَ دژمن ءِ ٹوھیں تاوانے ءِ دیگ ءَ پد شھید بیتگ. جارکش ءَ گوشتگ کہ شھید سنگت سمی الله پنام ءِ سمیر ء مھمد اکرم ، شھید سنگت شیریار پنام ءِ چیئرمین ء مھراب ھان شاھوانی ءُ شھید سنگت سجاول پنام ءِ چیده ء بھاول ھان شاھوانی ، سئیں سنگت مستونگ ءِ ھند پڑنگ آباد ءِ جھمنند بیتگ اَنت. اے سئیں سنگت گوستگیں سال ءَ گوں بی ایل اے ءَ بندوک بیتگ اَنت بازیں سوبمندیں کاروائیانی بھر جوڑ بیتگ اَنت ، پہ دژمن ءِ تاوان دیگ ءُ گل ءِ زمہ واریاں ھمک وھد سنگراں ساڑی بیتگ اَنت ، آیاں ماں راجی آجوئی ءِ راه ءَ گوں وتی زند ءِ ندر کنگ ءَ بلوچ ورناھانی راه ءِ چراگ جوڑ بیتگ اَنت. آئی ءَ گوشتگ کہ شھید سنگت نادر پنام ءِ چراگ ء مزار ھان لھڑی ، چوناھا کلات ءِ ھند نرمک ءِ جھمنند بیتگ کہ رند ءَ شال ءَ اتکگ ءُ جھمنند بیتگ ، آئی ءَ چیرجنگی کرد گوں سک مھکمی ، سوھوئی ءُ دژمن ءِ گون ءَ دیم پہ دیمی ءَ پیلو کرتگ اَنت. پہ گل ءِ کاراں ھمک وھد ساڑی ءُ داں گڈی وھد ءَ وتی زمہ واریانی سر ءَ اوشتوک بیتگ. جارکش ءَ گوشتگ کہ شش جون ءَ آدینگ ءِ شپ ءَ مستونگ ءِ ھند اسپلنجی ، مرو پھل ءَ پاکستانی لشکر ءَ لشکرکشی کرتگ ، ایشی ءِ آسر ءَ بی ایل اے ءِ سرمچار ءُ پاکستانی لشکر ءِ میان ءَ میڑ بندات بیتگ ، داں سھب ءَ برجاھیں میڑاں دژمن ءِ کم چه کم ھپت کارمند مرتگ ءُ باز ٹپی بیتگ ، ھمے وڑ ءَ دو سرمچار سنگت زاپران پنام ءِ ھلیل ءُ سنگت سناء پنام ءِ اینگل شھید بیتگ اَنت. آئی ءَ گوشتگ کہ شھید سنگت زاپران پنام ءِ ھلیل ء اسماھیل سمالانی بولان ءِ ھند پیر اسماھیل مارواڑ ءِ جاه منند اَت ، آ 2014 ءَ راجی آجوئی ءِ راه ءَ گوں بی ایل اے ءَ بندوک بیتگ ءُ دژمن ءِ بگیری ءَ جنگی سنگراں ساڑی بیتگ. ناگاھو ءِ ءِ سنگراں بازیں جنگاں ھوار بیتگ ءُ دژمن ئے پروش داتگ ءُ گڈی ءَ کماندارے ءِ پارست ءَ شھید بیتگ. شھید زاپران یکشلیں جھد ، مھکمی ، آشوبی کرد ءُ راستی ءِ چیدگ اَت ، آئی ءَ داں یازده سال ءَ همک وهد ءُ ھمک جاور ءَ دژمن ءِ بگیری ءَ جنگ داتگ ءُ بے مٹیں کرد پیلو کرتگ اَنت. جارکش ءَ گوشتگ کہ شھید سنگت سناء پنام ءِ اینگل ء انایت الله ساتکزئی اسپلنجی ءِ ھند پھل مرو ءِ جھمنند اَت ، آ یک سالے پیش گوں بی ایل اے ءَ هوار بیتگ ءُ کسانیں وھدے ءَ گوں آشوبی مھکمی ءُ جوزگ ءَ ھمے گپ پدّر کرتگ کہ دیمونی ءِ توکل ءَ گوں اُمبر ءَ کار نیست ، آئی ءَ ناگاهو ءِ سنگراں وتی زمه واری جوانیں وڑے ءَ پیلو کرتگ اَنت شھید بیتگ. آئی ءَ گوشتگ کہ هشت جون ءِ شپ ءَ پنجگور ءِ بونستان ءَ دژمن ءِ راه ءِ سر ءَ شورھانی چیر کنگ ءِ میان ءَ بوتگیں تراک ءِ آسر ءَ بی ایل اے ءِ سرمچار سنگت وسیم کاشانی پنام ءِ چراگ شھید بیتگ. سنگت وسیم ء ھاجی مھمد اکبر کاشانی بونستان ، پنجگور ءِ جھمنند اَت ، آئی ءَ چاگردی کارانی سَنَد بیتگ ءُ ریاستی لشکر لیویز ءِ تہ ءَ ساڑی بوگ ءَ اَبید ھم 2021 راجی گھگیری ءِ راه ءَ گوں بی ایل اے ءَ هوار بیتگ ءُ داں پنچ سالاں شھر چیرجنگی کاراں بیتگ ، دژمن ءِ بگیری ءَ گوں چیریں کرداں بازیں کاروائیاں ھوار بیتگ ءُ وتی پجار ءُ کار گوں رازداری ءَ داشتگ اَنت ، گڈی ءَ گل ءِ زمه واریانی سرجم کنگ ءِ میان ءَ شھید بیتگ۔ آئی ءَ گوشتگ کہ سی ءُ یک مئی ءَ بی ایل اے ءِ سرمچار سنگت دلاور پنام ءِ جاسم زورگریں پاکستانی لشکر ءِ جوڑ کرتگیں ھندی کارمندانی ارش ءَ ٹپی بیتگ ءُ پد ءَ شھید بیتگ۔ شھید سنگت دلاور ء ھمزہ بلوچ پنجگور ءِ ھند لیگورک بازار ءِ جاہ منند اِنت۔ آ 2011 ءَ سلاہ بندیں جھد ءَ ھوار بیتگ ءُ پانزدھیں سالانی میان ءَ سیائیجی، پروم، زامران ءُ پنجگور ءِ جنگاں گوں توکل ءَ دژمن ءِ بگیری ءَ کار ءَ بیتگ۔ شھید دلاور ھمک وھد ءَ راجی آجوئی یا مرگ ءِ لیکہ ءَ گوں بندوک بیتگ ءُ داں گڈی دمان ءَ وتی لیکہ ءِ سر ءَ اوشتاتگ۔ جیھند بلوچ ءَ گڈی ءَ گوشتگ کہ اے درسیں ھمبل وتی زمہ واریانی پیلو کنگ ءِ میان ءَ گوں دژمن ءَ دیم پہ دیمی ءَ شھید بیتگ اَنت۔ بلے آیاں دژمن تاوان داتگ ءُ وتی مشن پیلو کرتگ ءُ شھید بیتگ اَنت۔ آیانی شھیدی نہ تیوک ءَ بلوچ راجی زرمبشت ءِ درچ ءِ مانزمان اَنت بلکیں پہ لگوریں دژمن ءَ تچکیں کلوھے کہ بی ایل اے ءِ سرمچار وتی جانانی دیمونی ءَ دے اَنت بلے سرجھل نہ کن اَنت۔ مئے جھد ھمے شھیدانی پدرنداں جنزاں کنت۔ https://t.me/Ashoob_News/8736