بلوچستان ءِ دو جتاجتائیں دمگ پنچ بیگواھیں مردماں لاش دزکپتگ اَنت Jun 12 , 2025 آشوب نیوز بلوچستان ءِ دمگ ڈیرہ بگٹی ءُ مشکے ءَ پنچ بیگواھیں مردمانی لاش دزکپتگ اَنت- گیشیں ھالانی رِد ءَ ڈیرہ بگٹی ءَ پاکستانی لشکر ءَ سے بیگواھیں مردم یک دروگیں میڑے ءَ کُشتگ اَنت- ھالانی رِد ءَ گوستگیں شپ ءَ ڈیرہ بگٹی ءِ تھسیل سوئی ءَ پیارا کالونی ءَ سے زورانسری آوار جنگ بوتگیں مردم کُشتگ ءُ آیانی لاش دور داتگ اَنت- آیانی پجّار الی بیگ ء پاھی بگٹی ، یوسپ پنّام ءِ وڈو ء شاھنواز بگٹی ءُ زاھد ء اُژمان بگٹی نام ءَ چہ بوتگ اَنت- زاھد بگٹی ءُ یوسپ پنّام ءِ وڈو بگٹی گوستگیں سال ھژدہ اکتوبر ءَ وھدے کہ الی بیگ بگٹی ھمے سال نوزدہ مارچ ءَ ڈیرہ بگٹی ءَ شھر ءَ پاکستانی لشکر ءَ زورانسری آوار جنی ءِ نشانگ کتگ- ھمے وڑ آواران ءِ تھسیل مشکے ءَ پاکستانی لشکر ءَ دو بیگواھیں مردم کشتگ ءُ لاش دور داتگ اَنت- اِھوالکار رِد ءَ بیگواھیں مردمانی پجّار اھمد ء جان مھمد ءُ الی مھمد ء ھکیم نام ءَ چہ بوتگ اَنت- نزر اھمد لشکر ءَ 23 دسمبر 2024 ءَ، وھدے کہ الی مھمد 01 پروری 2025 ءَ مشکے ءِ بازار ءَ کنڈی ءَ آوار جنگ ءَ پد بیگواہ کتگ- دوئیں مردمانی تیرسُپتگیں لاش گوستگیں روچ ءَ لشکر ءَ مشکے ءِ نادُراھجاہ ءَ سر کتگ اَنت- زانگ بہ بیت بلوچستان ءَ دروگیں میڑاں بیگواھیں مردماں کُشگ ءُ دور دیگ درچ برجاہ ءَ اِنت- https://t.me/Ashoob_News/8742