‏"احفظ وجوه الذين رأيتهم في أوقات شدتك جيدًا، ولا تسمح لغير تلك الوجوه برؤيتك حين تزول الشدائد، فالجمهور كبير، لكن المقاعد محدوده." يا صديقي الدنيا غريبه ، وقلوب الناس أغرب. وقت الضيق، وقت الشده ، وقت ما تكون في أسوأ حالاتك، إلتفت حولك زين، شوف مين اللي واقف معاك، مين اللي يمد يده ولو بكلمه ، مين اللي يحس بوجعك وكأنه وجعه. هذولا، يا صديقي، هم الناس اللي تستاهل تكون في حياتك. احفظ وجوههم، احفظ أساميهم، احفظ مواقفهم، لأن هذي الوجوه هي اللي تبان معدنها الأصيل وقت الجد. بس، إذا انقلبت الأيام، وصرت في عزّك، وارتفع مقامك، وانفرجت أمورك، لا تفتح الباب لكل من هبّ ودبّ. الناس كثار ولكن المقاعد محدوده ، زي ما قالوا. اللي يفرحون بنجاحك ويتباهون فيك اليوم، ما كانوا يعرفونك أمس. خلّك ذكي ، ومثل ما تحب الناس يكونون معاك في شدتك، كون أنت كذلك مع غيرك. لا تنسى، الدنيا دوّاره ، واليوم إنت فوق، وبكره الله أعلم وين تكون. الناس اللي كانوا معاك في الضيق، هذولا هم اللي يستاهلون يشاركونك فرحتك. مو كل واحد يجي يضحك بوجهك يصير من ربعك. الكلام الحلو رخيص، بس المواقف الصادقه هي اللي تثبت معدن الناس . فتش في قلبك، وشوف مين اللي كان يسأل عنك، مين اللي دعا لك، مين اللي وقف جنبك . هذولا هم أهل الوفاء، وهذولا هم اللي يستاهلون مقاعدك الخاصه يا صديقي، من جاك بالطيب، زده طيب. ومن نساك ، لا تعاتبه، بس خلّه بعيد عن دائرتك. الدنيا مدرسه ، وكل موقف فيها درس. احفظ دروسك كويس وتعلم منها و لا تنسون إن الرزق والفرج بيد الله. ادعوا ربكم، وثقوا فيه، وكونوا من اللي يوقفون مع الناس في ضيقهم، عشان ربي يوقف معاكم في ضيقكم. الخير يدور، والطيب يرجع. خلّوا قلوبكم نظيفه ، ومواقفكم جميله ، وإن شاء الله ربي يجعل أيامكم كلها فرح وسعاده 🤍