لو رجعت سنين الكلية وانت عارف اللي تعرفه دلوقت حتغير ايه؟ ج / السؤال ده سألتهولي طالبة ذكية جدا .. الموضوع ده رغم انه مهم جدا الا ان قلائل مش بيخجلوا يتكلموا فيه .. فللأسف المشاكل الشائعة اوي اللي كلنا عشناها بتفضل موجودة وكل طالب بيفتكر نفسه لوحده في الدوامة .. خصوصا ان ناس كتير حواليه بتخبي مشاكلها ورا جدار من القوة او الثقة المصطنعة! فأنا حبيت أشارك رؤيتي للموضوع ده كواحد كان طالب لسه من ٦ سنين .. يمكن تفيد حد: انا شخصيا في الكلية فيه ٣ حاجات لو رجعت مش حاصرف فيهم أي وقت: ١) الوقت اللي صرفته في الاحباط (تبا ملحقتش أراجع / اللي امتحني شفوي كان malignant / انا غبي مبتعلمش أبدا / مش عارف احفظ … الخ) ... ٢) الوقت اللي صرفته في التفكير العاطفي (الحب / التفكير في الجواز / كله ارتبط وسابني / السؤال الوجودي بتاع ”مش حنفرح فيك بقى") … ٣) الوقت اللي صرفته في الشك في بكرة وتساؤلات المصير (ياترى حاسافر؟ ياترى حاتعيّن؟ ياترى حاشحت؟ / ياترى حاعرف اكوّن نفسي؟ … الخ) الحاجات دي "كلنا" صرفنا فيها كم وقت كبير وفِي الاخر اكتشفنا انها ما فادتناش بأي حاجة وكل القلق ده كان مجرد وساوس ... وده لأن القلق كأس بيعدّي على كل طالب طب ولازم يشرب منه .. مش عيب خاص بسيادتك خالص! ده علامة على انك طبيعي جدا! أبشر ☺️ بالنسبة للدرجات .. انا شايف ان كلنا من أول الدفعة الى أخير الدفعة كله اشتغل وربنا رزقه .. أما مدى السعادة والغنى والنجاح فدول مطلعوش خالص مرتبطين بترتيبك او الدموع الحارة اللي بكيتها عشان (ملحقتش تشوف ال slide وتاخد الدرجة) .. اجتهد آه بس ماتصرفش وقت في الاحباط! مش حيجيبلك درجات ... علاقات الكلية أخذت وقت من ناس كتير اكثر مما أعطت .. فيه ناس نجحت فيها ايام الكلية وناس نجحت بعد التخرج .. ومدى النجاح العاطفي برضه مطلعش متعلق بسرعة الارتباط .. على رأي دكتور هيثم عبد اللطيف الله يرحمه "يا ولاد حب ايه بس؟ انت في التوتر بتاعك ده لو عّم سيد عامل المشرحة طبطب بس عليك حتحبه" ☺️ .. فلو عاوز تتجوز اتفضل بس لو ملقتش شخص مناسب ماتصرفش وقت في القلق! ... مبيجيبش عرايس ... اما اللي كان شاكك في بكرة كل يوم لقى ان بكرة مش مخيف زي ما كان فاكر .. فيه حمل ثقيل اه لكن برضه قدراتك وانت متخرج أعلى من قدراتك وانت طالب .. ولقينا برضه إن مدى الأمان في العمل والتعليم سواء جامعة ولا صحة ولا بره مصر مطلعش متعلق بكم الوقت المنفق في التخطيط والقلق .. فاشتغل وخطط اه بس ماتصرفش وقت في التساؤلات! مبتجبش فلوس ... وأخيرا كنت حاحرص جدا اني اعمل اللي باحبه سواء رياضة او هواية او فسحة او زيارات عائلية .. صدقني الرغبة في تقديم تضحيات بطولية بكل اللي بيوزن نفسيتك عشان تقنع نفسك انك Nerd وانتحاري الطب الأوحد بتقلب ب Burn Out وتلاقي الاحباط ملازمك مهما عملت .. فاتبع سبل الوقاية وخليك طبيعي احسنلك ☺️ د. نزار عبد الفتاح #الطب_سؤال_وجواب