صفااللہ کے دوران حراست قتل کے خلاف لواحقین کا ڈی سی آفس کیچ کے سامنے احتجاجی مظاہرہ جمعہ، 13 جون 2025 / زرمبش اردو https://urdu.zrumbesh.com/19110/ صفااللہ ولد مولابخش کے لواحقین نے ڈی سی کیچ آفس کے سامنے احتجاجی مظاہرہ کیا۔ مظاہرین کے مطابق صفااللہ کو 20 مئی کو پاکستانی فورسز نے حراست میں لے کر جبری کیا تھا، لیکن 29 مئی کو اچانک ایک ایف آئی آر درج کر کے یہ دعویٰ کیا گیا کہ وہ ایک مبینہ مقابلے میں ہلاک ہوا ہے، جو سراسر جھوٹ اور زیادتی پر مبنی ہے۔ احتجاج میں خواتین اور بچوں سمیت بڑی تعداد میں شہری شریک ہوئے۔ مظاہرین نے ڈی سی آفس کے مرکزی گیٹ کے سامنے دھرنا دیا اور انصاف کی فراہمی کا مطالبہ کیا۔ لواحقین کا کہنا تھا کہ صفااللہ کو دورانِ حراست قتل کیا گیا اور اب اسے جھوٹے مقابلے کا رنگ دے کر واقعے کو چھپایا جا رہا ہے۔ مظاہرین نے یہ بھی دعویٰ کیا کہ ایک اور نوجوان، شاہ جہان کو 14 مئی کو جبری طور پر لاپتا کیا گیا، اور تاحال اس کے بارے میں کوئی معلومات نہیں دی جا رہی۔ اُن کا مطالبہ ہے کہ شاہ جہان کو فوری طور پر بازیاب کیا جائے اور صفااللہ کے ماورائے عدالت قتل کی غیر جانب دارانہ تحقیقات کی جائیں۔ لواحقین اور مظاہرین نے اعلیٰ حکام، انسانی حقوق کی تنظیموں اور عدلیہ سے اپیل کی ہے کہ وہ اس معاملے کا فوری نوٹس لیں اور جبری گمشدگیوں کے خاتمے اور لاپتہ افراد کی بازیابی کے لیے عملی اقدامات کیے جائیں۔