الاثار المتوقعة و المثيرة للقلق فيما يتعلق بموجة تعويم الطب الحالية طبعا وجود جامعات جديدة يستلزم وجود مستشفيات جامعية جديدة وده بيوظف استاف كتير وكان سابقا وجود المستشفي شرط لتشغيل الكلية ولكن تم تغيير القانون وتم افتتاح كليات كتير بدون مستشفي جامعي اعتمادا علي مستشفيات حكومية أخري --------» المطلوب إجبار الجامعات علشان سرعة تنفيذ مستشفيات جامعية و تقدم خدمة مجانية أو شبه مجانية ومتكونش استثمارية زي مستشفي جامعة 6 أكتوبر و MUST لان دي حاجة هتمس جودة الخريجين المشكلة التانية هو عدم وجود بنية تحتية من مدرجات وقاعات امتحانات ومعامل واستاف يكفي عدد الطلبة الي بيدخلوا كل جامعة و ده كان واضح جدا في الجامعات الأهلية الي بتفتح ومعندهاش اي حاجة تذكر يعني وبناء عليه تتحول الجامعة الي تعليم اونلاين او منازل و فئة قليلة هي الي بتحضر و تستفيد -------» المطلوب إجبار الجامعات علي عدد محدد من الطلبة يتناسب مع البنية التحتية و عدد الأستاف المتوفرين طبعا وجود عدد كبير من الخريجين سيؤدي لتشبع منظومة التكليف و ايضا التخصصات الملحة غصب عنهم لانه لن يكون هناك بديل و ده عظيم بالنسبة للحكومة و لكن المشكلة هتحصل في سوق البرايفت الي بالفعل بينكمش بسبب الظروف الاقتصادية الصعبة فعدد خريجين كبير = زيادة في المعروض مع قلة في الطلب في حالة ثبات الاسعار فهنبدأ نشوف ظاهرة الحرق في المرتبات و الاسعار و ده هيخلي حالة الأطباء المادية تنحدر و بشدة -------» المطلوب التشديد في منع الطلبة و الامتياز من العمل في سوق البرايفت و حصره علي النواب و الاخصائيين والاستشاريين كما ينص القانون و تخفيف الأعباء المادية علي الطبيب زي أعباء الدراسات العليا و كورسات الCME و اي مصاريف يتحملها الطبيب بوجه عام ومنحهم امتيازات إضافية المشكلة الأكبر هتتمثل في الفرصة التعليمية الpostgrad في كل التخصصات تقريبا حيث أن المستشفيات المميزة عددها قليل و البرامج التعليمية زي الزمالة بتاخد بالكتير الفين متدرب سنويا و الماستر و الدبلومات فيها وسايط و تحيزات و بتفضل خريجين الجامعات أنفسهم و تقريبا كل الجامعات الخاصة والأهلية الجديدة مافيهاش برامج ماجستير ففرص التدريب هتكون قليلة جدا جدا و هتكون المجاميع المطلوبة كبيرة جدا خصوصا أن برامج التعليم بينافس عليها كل الخريجين القدامي و الجدد و الحل البديل هيكون برامج زي البورد العربي و العسكري و ماستر الجامعات الخاصة والزمالات الأجنبية والطبيب الزائر و دي كلها برامج مكلفة جدا جدا وستكون فقط لمن استطاع إليها سبيلا خصوصا وأن الوافدين بينافسوا علي المقاعد دي و ممكن تلاقي برامج تدريبية بدون مرتب زي الاردن الشقيقة كدا -------» الحل المقترح التوسع في برامج التدريب في الزمالة المصرية و برامج الماستر و الدكتوراة في الجامعات المختلفة و تخصيص كوتة لحديثي التخرج الحقيقة أن كل الحلول صعبة ومكلفة جدا و حتي الان مش مطروحة علي اجندة خطة تطوير المنظومة الصحية في مصر الي بتتبناها الحكومة الحالية و استمرار الوضع بدون تلك الحلول هيؤدي الي تخريج أطباء ضعفاء علميا و مهنيا وبدون تدريب حقيقي أو شهادات post-grad و جزء كبير منهم بدون تخصص اصلا و تحت أعباء مالية كبيرة و ده هيقلل من قيمتهم كخريجين و يضرب السمعة عالميا و سيكون النجاح والبقاء لفئة قليلة جدا من الفائقيين علميا أو المقتدرين ماديا و لكن عموم الأطباء وللأسف ولأول مرة ستصيبهم البطالة كما أصابت تخصصات اخر زي التجارة و الحقوق و مؤخرا الصيدلة والأسنان والعلاج الطبيعي خصوصا أنه اكيد التكليف في مرحلة ما هيحصله تشبع أيضا و هتبقي مخير بين التكليف و الشغل البرايفت زي الصيادلة أو بتتنافس مع زميلك علي التكليف زي اسنان توقعي الشخصي أن الكلام ده هيحصل في خلال 10-15 سنة من الآن في حالة ثبات الوضع علي ما هو عليه نتمني إن حد مسئول يطلع يطمننا و يناقش التوقعات والتخوفات دي بمنطق وأفعال ! المشكلة أن الموجة دي حاصلة بالتزامن مع موجة أخري من زيادة صعوبة فرص السفر اتكلمنا قبل كدا أن الخليج محتاج استشاريين فقط و يمكن السعودية الي لسا عايزة اخصائيين بدرجة أقل في بعض التخصصات مش كلها و المرتبات نزلت و ظروف العمل بقت اصعب و غربا بريطانيا بتتشبع بشكل كتير و التراك بقي صعب و مكلف و تراك امريكا مكلف جدا جدا و الظروف السياسية هناك حاليا زودت الموضوع صعوبة واحنا في انتظار أن تتكشف طرق جديدة لم نكن نعلم عنها أو زوال الغمة زملائي شباب المهنة من الامتياز و التكليف لو عندي نصيحة اقدمها لنفسي وليكمفي الوقت الحالي هي أنه المطلوب حاليا انك وفي اسرع وقت ( خلال ال10 سنوات القادمة ) تاخد اكبر قدر ممكن من الشهادات العلمية و الخبرة العملية و تتميز في جانب محدد وتعمل لنفسك فيه اسم وسمعة و بعدين يبقي عندك your own business في مجالك أو تسافر كإستشاري أو تدرس post grad يدوبك نلحق قبل ما موجة تعويم الطب تطولنا 😅 اما عن زملائي الأصغر الي لسا داخلين الكلية بصراحة انتم الآن في خريف الطب و هتتخرجوا علي وضع عمره ما عدي علي أطباء مصر فمحتاج تتميز اوي علميا بأنك تجيب اعلي درجات ممكنة أو تتميز ماديا فتقدر تشق طريقك بالفلوس بعد التخرج الي ما بين الاتنين دول موقفك صعب بس الأرزاق بيد الله مطلوب منك تتميز بحاجة في وسط ال29 ألف خريج و مطلوب تفكر و تشتغل علي ده من بدري وبالتوفيق للجميع إن شاء الله