السلام عليكم ورحمة الله وبركاته الليلة جاية أسلط الضوء على موضوع يمكن أغلبنا مرَّ بيه دا لو م كلنا ، ألا و هو التعلق . التعلق دا ي جماعة مرض قاااتل بالمعنى الحرفي و بدون مبالغة و عارفين المرعب في الموضوع شنو؟ إن 80% مننا م بيدرك الموضوع إلا بعد يحصل مرحلة متأخرة و في الحقيقة نحن بنكون مدركين بس بنعمل رايحين عشان الحقيقة مؤلمة و م بنقدر نتحملها.😢 و من ناحية تانية التعلق دا حاجة جمييييلة و ممكن نؤجر عليها عديل كدا... _ كيف يعني نؤجر عليه ؟؟ تعالو نعرف أنواع التعلق عشان تعرفوا كيف ممكن نؤجر عليه. _ هو بالله عنده أنواع؟!!🤔 أيوة عنده و أول نوع و أجمل و أهم نوع و دا واجب شرعاً و هو التعلق بالله و دا بكون بإنك تعتمد عليه اعتماد كاااامل و تعظمه و تحبه فوق كللل شي. و عكسه طوالي التعلق بغير الله و دا انك تتعلق بحاجة تانية اعتقادا منك انها حتنفعك بدون م تتوكل على ربنا زي مثلا انك تشرب دواء و تعتقد انه حيشفيك حتى لو م كنت معتقد انه ربنا هو الشافي و برضو تعليق التمائم ظناً منك انها حتحميك و دا و العياذ بالله من أنواع الشرك و حرررررام شرعاً و النبي صلَّ الله عليه و سلم قال:" من تعلق تميمة فقد أشرك". النوع التالت و دا التعلق العاطفي انك تحب زول او تخصص او هواية و بكون طبيعي يعني لو حصل و الحاجة دي بقت ماف تأثيره م بكون كبير يدوب تلحق تزعل و تتخطى على طول و دا حلال شرط انه الحب دا ما يتعدى حبك لربنا و ما يشغلك عن طاعته و النوع دا من ايجابياته انه بكون دافع لينا عشان نحقق أحلامنا.♥️ و داخل في النوع دا برضو موضوع الدواء الفوق داك شرط انك تكون مؤمن انو الدواء دا مجرد سبب في الشفاء و انو الشافي هو ربنا و كمان الشغل لمن تجي تشتغل تكون مؤمن انو الشغل مجرد سبب و الربنا هو الرازق. و عكسه تماماً النوع الرابع و دا الله يحميني و يحميكم منه ببدا بصورة طبيعيه و شوية شوية بزيد لدرجة انك بتلقى الحاجة الانت متعلق بيها دي بقت *محور كونك* و بتكون مهووس بيها و ما بتقدر تعيش بدونها و بتشوف ان الحياة ما ليها معنى بدونها و لو كان زول بتلقى نفسك حصلت نقطة كدا انت مخرب علاقاتك مع كل الناس و مركز مع زولك دا بس و بتكون و العياذ بالله مستعد تأذي نفسك و اللي حولك لو الزول دا سابك ولا حصلت ليه حاجة و في ناس و نسأل الله السلامة ببقو مرضى نفسيين و ممكن يخشو مصحة عقلية بسبب الحاجة دي و النوع دا حررام برضو و من اضراره ان الواحد بكون مضيع كل حياته و قاعد حارس زول واحد بس و نفسيته بتكون دايما بايظة و غالبا بيمر بمرحلة من الاكتئاب و هو بحاول يتخطى الزول دا . في مرة في زول قال لي:( نفسك دي زي الحفرة اللي حولينها سكاكين و زجاج ي تفضلي عالقة جوا ي تطلعي و انتِ كلك جروح و تدفعي الثمن غالي) بس انا هنا بشوف ان التعلق هو الحفرة دي ي فضلنا جوا ي دفعنا ثمن غااالي و طلعنا.💔 ابن القيم في مدارج السالكين قال:" التعلق بغير الله من أعظم أسباب الشقاء ، لأنه يورث إنكسار القلب و إنصرافه عن الله و انشغال النفس بما لا ينفع". بكدا نحن نكون عرفنا أنواع التعلق و عرفنا أي واحد مفروض نبعد منه و أي واحد مفروض نحافظ عليه و في البوست الجايي بإذن الله حنعرف كيف نحمي نفسنا من التعلق ولو لا قدر الله لقينا نفسنا في نص الحفرة نعرف كيف نطلع منها و نتخطاها بأقل أضرار ممكنة و السلام على قلوبكم حتى ذلك الحين.🤍 #دعاء #الدعم_النفسي #مبادرة_نحنا_معاك