كنت في الشارع مرة وصحبتي معاي فجاة وقعت في الارض انا ما عرفت اعمل شنو اديتها موية بقيت انادي بأسمها ناديت الحواليني وانا ما عارفة مالها ، حالات كتيرة بتكون حالات الاغماء، احيانا حصلت قدامنا او سمعنا عن فلانة الوقعت بدون سبب بس ما عرفنا الاتعامل مع الموقف دا عمل شنو وليه ، حنتكلم اليوم عن حالات الاغماء وكيف يتم التعامل معاها . ◆ اول حاجة نعرف يعني شنو إغماء : الاغماء حالة لفقدان الوعي عادة المؤقت ، ودا بيحصل استجابة لنقص الاوكسجين الواصل للدماغ ، او عدم وصول الدم بصورة كافية . ◆ الاسباب المؤدية لحدوث إغماء : - في حالة انخفاض في ضغط الدم . - مشاكل في القلب . - إنخفاض السكر في الدم . ◆ كيف تتعامل مع شخص أغمي عليه قدامك : حاول انك تتكلم معاهو تناديهو تشوفو هل بيستجيب لصوتك ؟ طيب ما استجاب امسك شحمة الاذن حقته واضغطها هل ح يستجيب ؟ طيب ما استجاب انتقل لخطوات تانية . تأكد من البيئة الموجود فيها الشخص تكون امنة عليهو وعليك . بعدها تأكد من حالة المريض واخر شي اتصل بالاسعاف . - حالة المريض : الخطوة الاولى بتفحص نبضه وفي حالة الاغماء كل الاماكن بكون نبضها ضعيف وافضل مكان لقياسه او تحسسه في الرقبة تشوف مستوى تفاحة ادم وين وتمشي منه يمين او يسار اذا حسيت بالنبض انتقل للخطوة التانية . اما اذا ما حسيت بنبض الشخص ابدأ انعاش قلبي رئوي لحدي ما يصحى او يصل الاسعاف ( حنذكره موضوع براهو ) . الخطوة التانية : اذا عنده نبض ، بحس وبشوف وبسمع التنفس ، انا بنزل خدي الى انف المريض وعيوني تنظر الى صدره فاذا بيتنفس بشوف حركة صدره وبسمع صوت انفاسه حتى لو ضعيف واكيد بحس بحرارتها . مافي نفس طوالي اتحقق من مجرى التنفس حقه يد على ذقن الشخص واليد التانية على جبينه ارفع ذقنه وحرك جبينه كانك بتشدها تجاه الارض . اذا في تنفس بنتقل للخطوة التالتة . الخطوة الثالثة : نتعامل معاهو على اساس انه فاقد سكر فبنديهو تلاتة معالق سكر مباشرة في فمه بدون نبلعو ليها بس نخليها في الفم عشان امتصاصها يكون اسرع . ونتعامل معاهو على اساس انو ضغطه منخفض فبنرفع رجوله بزاوية ٣٠ عشان نساعد انو الدم يرجع للدماغ . من الحاجات اللي انت بتحاول تساعدها بيهو انك تخفف من الحاجات البتخنقو من ملبوسات . اذا كان في نزيف بنضغط عليه لحدي ما يوصل الاسعاف . نتابع مع الدكتور في الحالات : إذا حدثت حالة الإغماء أكثر من مرة واحدة. إذا احتاج المريض إلى أكثر من دقيقتين ليعود له وعيه بعد حدوث الإغماء. إذا كانت المريضة لديها شك أنها حامل. إذا فقد المريض السيطرة على المثانة أو الأمعاء عند فقدانه وعيه بعد الإغماء. إذا كان يشعر المريض أن لديه عدم انتظام في ضربات القلب. إذا كان لدى المريض وجع وألم في الصدر. إذا كان هناك تاريخ مرضي للمريض أن لديه إرتفاع أو إنخفاض في ضغط الدم أو مرض السكري أو أي مشاكل في القلب . #المحتوى_الطبي #الدعم_النفسي #مبادرة_نحنا_معاك