السلام عليكم ورحمة الله وبركاته بعدما ما عرفنا يعني شنو كوليرا و كيف بتشتغل جوا أجسامنا و كيف بتنتقل و كمان أعراضها ، الليلة بإذن الله حنعرف طرق الوقاية منها. أولا ي جماعة بما انو السبب الأساسي في انتقال الكوليرا هو التلوث ف نحن محتاجين جداً اننا نحافظ على بيئة نظيفة بقدر الممكن و ننظف أي مكان نحن بنقعد فيه و بنشتغل فيه سوا كان بيت أو مكتب أو مدرسة أو غيرهم و نحن ف حد زاتنا نحافظ على نظافتنا الشخصية و نغسل يدينا بعد الحمام (أكرمكم الله) و قبل الأكل بموية و صابون كوووويس . تاني شي أي خضار أي فواكه أي حاجة بتتاكل من غير م تنطبخ في النار نغسلها بالموية كووووويس بعدين نستخدمها و الأكل اللي بيحتاج نار نتأكد كويس انه إنطبخ و نضج و نبعد من الأكل النيئ و ال م مطبوخ كويس. تالت حاجة الموية البنستخدمها سواء عشان نعمل بيها أكل او نشربها لازم تكون نظيفة و لو م متأكدين من نظافتها يفضل و يستحسن جددددداً إننا ي إما نغليها أو نستخدم كلور إن وُجد (5 نقاط لكل لتر من الموية) أو أي أقراص تنقية مياه حسب التعليمات حقتها. رابع شي نغطي كل حاجة متعلقة بالمطبخ سواء أدوات أو أكل أو حتى الأزيار عشان م يجي عليها ذباب. خامساً نتخلص من الزبالة في الأماكن المخصصة ليها و بطريقة آمنة حفاظا على نفسنا و صحتنا . الخطوات دي رغم إنها بسيطة جداً و م صعبة إلا أن أغلبنا بستهين بيها ف أنا عايزاكم تعرفوا إنو صحتكم أولوية و انتو مسؤولين عنها ف ما تستهينوا بيها و حافظوا عليها و إهتموا بيها و خلو بالكم من نفسكم و من أهلكم و م تبخلوا على زول بمعلومة ممكن تفيدوا و وعوا نفسكم و اللي حولكم. نحن جيل واعي و نحن اللي حنرفع البلد دي ف لو م اهتمينا بأبسط حاجاتنا كيف حنبني وطنا اللي من قمنا بنقول حنبنيهو؟ الكوليرا مرض خطير و م يحتاج اوريكم بس كمان نحن أخطر و أقوى منو و مع بعض بنقدر نواجه كل شي و ربنا يحفظنا و يحفظ أهلنا و وطنا و يخفف و يرفع عننا البلاء🤍 #سلامتك_أولوية #معاً_لنشر_الوعي #الدعم_النفسي #مبادرة_نحن_معاك