-أمسكي هنا ثبتي معاي من الإتجاه التاني أربطيها كويس يابت.. =ياا أمي يخ فترت انا من القصة دي، شغلة فارغة ساي عليك الله😪 - نحن لو ما الناموسية دي مع الباعوض د كان كِملنا زمااان وبعدين أخوانك ديل صغار الواحد لو جاتو ملاريا ساي بترجعو سنة ل ورا ! ــــــــــ كلنا سمعنا الحوار ده بين الأم وبتها، وأكيد مر بينا الموقف د بتلقي في زول تبارك الرحمن مهتم جدآ بالحفاظ علي صحة العائلة وقلبه عليها لأنه مقدر جدآ قيمة العلاج وأنو الأمراض دي خطيرة قدر شنو ، خصوصاً الأوضاع الكارثية في السودان وبعد الأزمة إتفاقمت الله المستعان. الوقـاية خيرُ من العـلاج وربنا سبحانه وتعالى ح يسألنا من نفسنا دي يوم القيامة ف لازم نحافظ عليها أشد محافظة .. إننا نعمل حاجات بسيطة تكون جزء من عاداتنا اليومية زي غسل اليدين بالصابون قبل وبعد الأكل وبعد الخروج من الحمام "أكرمكم الله"، نهتم بالنظافة عشان نمنع توالد الحشرات، الإهتمام بالأعراض وعدم تجاهله ومانربي المرض في أجسامنا لأن العلاج في بدايته دائماً هين. ما تتعالج بالإحساس .. ماتقول ملاريتي بعرفها براي وبجيب العلاج ياما ناس بعرفهم إفتكروها ملاريا وأتجاهلوها وطلع كانسر حمانا الله💔 التلاتة حبات ما علاج للنزلة، البندول ما بتبلع في آي حاجة، العلاجات دي إتعلمت كل واحد لمرض معين وإذا حصل خلط بتحصل مضاعفات خطيرة لاقدر الله . قال دكتور جميل قدسي: "اتباع نظام حياة صحي وتعزيز الإيمان يمكن أن يسهم بشكل كبير في شفاء الأمراض". حاولو خففو السكر شوية شوية، اتعرضو لشمس الصباح لأن فيها فيتامين دال، اتمشو واعملو رياضية كل فترة. وأخيراً ما تهملو المرض، الإهمال للمرض ما كويس، اهمال المرض مااا شنووو؟! العلاج بالقرآن والرقية الشرعية، قال تعالي: "وَإِذَا مَرِضْتُ فَهُوَ يَشْفِينِ". ما تجهلو التحصين وقراءة الأذكار، أنتبه ع صحتك أنت مسؤول من المحافظة عليها وما أصابكم من مصيبة فمن الله .. المرض حسنة وأجر، كفارة للذنوب، والإبتلاء حُب من ربنا لعبده وإختبار لمـدي صبره‍💟٭. #عبق_ الشاذلي #الدعم_النفسي #مبادرة_نحنا_معاك