بہتر زندگی کے 5 اصول ڈسپلن اس کائنات کا پہلا اصول ہے‘ آپ آج دو سو سال بعد کے طلوع آفتاب اور غروب آفتاب کا وقت معلوم کرلیں‘ سورج یقینا اس دن بھی سیکنڈز کے حساب سے وقت پر طلوع ہو گا اور عین وقت پر غروب ہو گا‘ چاند‘ ستارے‘ ہوائیں‘ بارشیں‘ پھول‘ پھل اور جان داروں کی پیدائش کا وقت تک معین ہے۔ہمارے دل کی دھڑکنیں تک طے ہیں چناں چہ آپ اگرخود کو قدرت کے ڈسپلن کے ساتھ جوڑ لیں تو آپ قدرے بہتر زندگی گزار سکتے ہیں۔ دو‘ انسان کو دنیا کے تمام جان داروں کے مقابلے میں کم خوراک درکار ہوتی ہے‘ شاید اسی لیے صرف انسان پر روزے فرض ہیں‘ چناں چہ آپ اگر خوراک کم کر لیں گے اور اس کے اوقات طے کر دیں گے تو بھی آپ کی زندگی اچھی گزرے گی۔ تین‘ انسان کے لیے ایکسرسائز یا واک لازم ہے۔ آپ اگر دن میں کم از کم ڈیڑھ گھنٹہ ایکسرسائز‘ واک‘ قیلولہ اور مراقبہ نہیں کرتے تو پھر آپ زندگی نہیں گزار رہے بلکہ زندگی آپ کو گزار رہی ہے۔ چار' انسان کو کام زندہ رکھتا ہے‘ آپ آخری سانس تک کام کرتے رہیں لیکن کام آپ کی مرضی کا ہونا چاہیے‘ آپ کے ٹیلنٹ کے مطابق ہو، مزاج کے خلاف کام قید ہوتا ہے اور قید محل میں بھی ہو تو بھی انسان کو مار دیتی ہے۔ پانچ' اللہ کے سوا انسان کا کوئی آسرا‘ کوئی سہارا نہیں‘ آپ اسے ہمیشہ ساتھ رکھیں‘ آپ کی زندگی اچھی گزرے گی۔ یہ نسخہ دنیا کے کروڑوں لوگ استعمال کر رہے ہیں‘ آپ بھی کر کے دیکھیں‘ آپ کو نتائج حیران کر دیں گے۔