تہران کا آئل ڈپو اور اسرائیل میں حیفا ریفائنری آج رات حملوں کا نشانہ بنے سوشل میڈیا پر شیئر کی جانے والی ویڈیوز اور بی بی سی ویریفائی کی تصدیق شدہ ویڈیوز میں ایران کے دارالحکومت تہران کے شمال مغرب میں تیل کے ایک ڈپو میں آگ لگی دیکھی جا سکتی ہے۔ بی بی سی ویریفائی نے جس ایک ویڈیو کی تصدیق کی، اس میں دو رہائشی شہران ڈپو میں لگی آگ کو دیکھ رہے ہیں۔ ایک اور کلپ میں ایک آئل ٹینکر میں لگی آگ کو دیکھا جا سکتا ہے، جس میں ایک شخص ان مناظر کو فلم کر رہا ہے اور ویڈیو کے وقت اور مقام کی تصدیق کر رہا ہے۔ خبر رساں ایجنسی مہر کی ایک رپورٹ میں اس مقام پر بنائی گئی ویڈیو سے بھی اس بات کی تصدیق ہوتی ہے کہ شہران آئل ڈپو کو نشانہ بنایا گیا۔ ایران کی وزارت پیٹرولیم نے کہا ہے کہ صورتحال ’کنٹرول میں ہے‘ لیکن ایرانی میڈیا نے لوگوں سے کہا ہے کہ وہ ’آئل ڈپو سے دور رہیں۔‘ دوسری جانب آن لائن شیئر کی گئی اور بی بی سی کی تصدیق شدہ ایک ویڈیو میں دیکھا گیا ہے کہ آج رات ایران کی جانب سے فائر کیے گئے میزائلوں کے بعد اسرائیل میں حیفا آئل ریفائنری میں آگ لگ گئی۔