#adhurimi në kohën e pakujdesisë Adhurimi në kohën e pakujdesisë ka shpërblim të madh dhe vlera e tij rritet, sepse kur njerëzit janë të zënë me dynjanë dhe zemrat janë të shpërqendruara, qëndrueshmëria jote në bindje ndaj Allahut ka një pozitë të madhe tek Ai. Dy rekatet e duhasë nuk të marrin asgjë nga koha jote, por mund të hapin për ty dyert e riskut dhe të jenë shkak që të mjaftojë për ty e gjithë dita, ashtu siç ka thënë i dërguari i Allahut ﷺ: “Çdo mëngjes, çdo asht i trupit tuaj ka nevojë për një sadaka. Çdo tesbih është sadaka, çdo tahmid është sadaka... dhe dy rekatet e duhase mjaftojnë për këtë.” [Transmetuar nga Muslimi] Adhurimi në kohët e pakujdesisë është dëshmi e sinqeritetit dhe dashurisë për Allahun. Kur shumica e njerëzve janë të përqendruar në jetën e kësaj bote – në punë, angazhime, rrjete sociale apo dëfrime – ai që i përkushtohet adhurimit, veçon veten me një shpërblim të veçantë. Ai njeri është sikur një dritë në errësirë, që ndriçon rrugën edhe për të tjerët. Namazi i duhasë është një mundësi e artë për këtë. Ai është i lehtë, por me shpërblime të mëdha. Përveçse është një formë falënderimi për çdo asht të trupit tonë, ai është edhe një formë e kërkimit të ndihmës nga Allahu për gjithë ditën. Shumë prej dijetarëve dhe të urtëve thonin se nëse njeriu fal duhan me përkushtim në mëngjes, ai do të shohë bereqet në ditën e tij – në kohë, në punë, në rizk dhe në shpirt. 🕊️ Këshillë për zemrën tënde: Mos e humbë këtë mirësi, dhe filloje ditën me një sexhde që ta ndreqë zemrën tënde. Mos e nënvlerëso asnjë adhurim të vogël. Dy rekatë mund të duken të thjeshtë, por te Allahu ato mund të jenë shkak për të fshirë mëkate, për të ngritur grada dhe për të sjellë paqe në zemrën tënde. 📍 Kujto: Koha e duhasë fillon rreth 20 minuta pas lindjes së diellit Përfundon rreth 20 minuta para namazit të drekës Mund të falësh 2, 4, 6 apo deri në 8 rekatë, sipas mundësisë dhe përkushtimit 🤍 Filloje ditën duke u përkulur për Allahun, që Ai ta ngrejë pozitën tënde në këtë botë dhe në ahiret. Muharrem Jakupi