*تم روتی کیوں ہو؟* تم وہ عورت ہو جس کے حسن کے قصیدے الفاظ کی چادروں میں سجائے جاتے ہیں تم وہ ہو جس کے لبوں کی مسکراہٹ سے موسیقار اپنی دھنوں میں سُر سجاتے ہیں، تم وہ ہو جس کے لیے فنکار اپنی تخلیقات کو جلا بخشتے ہیں تم وہ ہو جسکی ہر ادا میں اک منفرد کہانی بکھری ہوئی ہیں تمہاری گود میں نسلوں کی پرورش ہوتی ہے، تمہارے لمس سے زخموں پر مرہم رکھا جاتا ہے، تمہارے الفاظ سے بکھرتے وجود سنبھل جاتے ہیں تم وہ ہو جس کے لیے بلند و بالا محل تعمیر ہوئے، جن کی دیواروں پر تمہارے حسن کی کہانیاں کنندہ کی گئیں۔ تم وہ ہو جس کے نازک ہاتھوں کی زینت کے لیے جواہرات تراشے گئے، تم وہ ہو جس کے نرم قدموں کی راحت کے لیے قالین بنی گئیں۔ تم وہ ہو جس کے لیے محفلیں سجائی گئیں، چراغ جلائے گئے، خوشبویں بکھیری گئیں۔ تمہاری ایک ہنسی نے کتنے ہی دلوں کو زندگی بخشی، تمہاری آنکھوں کے آنسووں نے کتنی ہی دنیا ویران کر ڈالی تم تو ہر آرزو کی تکمیل ہو، ہر خوشبو کی مہک ہو، ہر محبت کا استعارہ ہو، ہاں ہاں کائنات کی سب سے حسین تخلیق ہو۔ *پھر تم روتی کیوں ہو ؟* کیا اس لیے کہ تمہارے خوابوں کو زنجیروں میں جکڑ دیا گیا ؟ یا اس لیے کہ تمہارے جذبات کو کمزور کہہ کر ٹھکرا دیا گیا ؟ یا اس لیے کہ تمہارے خلوص کو بوجھ سمجھا گیا، تمہاری قربانیوں کو معمولی جانا گیا ؟ کیا اس لیے کہ تمہارے وجود کو محض ایک جسم تصور کیا گیا، اور تمہاری روح کی لطافت کو نظر انداز کر دیا گیا؟ تم روتی ہو کیونکہ تمہاری عظمت کو پہچان کر بھی تمہیں معمولی سمجھا گیا۔ تم روتی ہو کیونکہ تمسے ہے پناہ محبت کی گئی، لیکن بدلے میں تم سے محبت کا حق چھین لیا گیا تم روتی ہو کیونکہ تمہیں ہر چیز کا حقدار جانا گیا، مگر آزادی اور احترام کا حق سلب کر لیا گیا۔ مگر جان لو، تم وہ روشنی ہو جو اندھیروں میں چراغ جلانے کا ہنر رکھتی ہو۔ تم وہ طاقت ہو جو پہاڑوں کو سر کر سکتی ہو ، تم وہ احساس ہو جس کے بغیر یہ دنیا بیرنگ نظر آتی ہے۔ تم وہ دریا ہو جو بنجر زمینوں کو سیراب کرتی ہے تم وہ الفاظ ہو جو خاموشی میں بھی ہونے کا احساس دلاتی ہے تم وہ بنیاد ہو جس پر زندگی کی عمارت کھڑی ہے اے عورت! تم محض ایک نام نہیں، تم ایک داستاں ہو۔ وہ داستاں جس میں حوصلے کی جِلا ہے، عزم کی رفعت ہے، صبر کی گہرائی ہے، عزت و عظمت کی صفت ہے۔ اپنی قدر و قیمت کو پہچانو، اپنی روشنی کو ضائع نہ ہونے دو، اپنی آواز کو دبنے نہ دو۔ اپنی شناخت کو یوں ماند نہ پڑنے دو کہ زمانہ تمہیں کمزور سمجھنے لگے *ابنِ گلفام سنابلی*