لیبیا سے قافلۂ صمود کی واپسی: مشرقی حکومت نے غزہ جانے کی اجازت دینے سے انکار کر دیا طرابلس / بنغازی – غزہ کے محاصرے کو توڑنے کے لیے نکالے گئے بین الاقوامی امدادی قافلے "صمود" (Steadfastness) کو مشرقی لیبیا کی حکومت نے مصر کی سرحد کی جانب سفر جاری رکھنے کی اجازت دینے سے انکار کر دیا ہے، جس کے بعد قافلہ اب واپس تیونس لوٹنے کی تیاری کر رہا ہے۔ یہ پیش رفت اس وقت سامنے آئی جب خلیفہ حفتر کی قیادت میں مشرقی لیبیا کے حکام نے قافلے سے تعلق رکھنے والے تمام گرفتار رضاکاروں کو رہا کر دیا۔ قافلے کا مقصد تھا کہ وہ زمینی راستے سے لیبیا سے ہوتے ہوئے مصر اور رفح بارڈر کے ذریعے غزہ میں انسانی امداد پہنچائے، تاکہ مظلوم فلسطینیوں کی مدد کی جا سکے۔ تاہم، مشرقی لیبیا کی حکومت نے قافلے کو لیبیا سے مصر کے راستے غزہ جانے کی اجازت دینے سے انکار کر دیا، جس پر قافلہ انتظامیہ نے واپس تیونس جانے کا فیصلہ کیا۔ قافلے کے منتظمین اور انسانی حقوق کی تنظیموں نے اس فیصلے پر افسوس کا اظہار کرتے ہوئے کہا ہے کہ غزہ کے لیے امدادی راستوں کو بند کرنا انسانیت دشمنی کے مترادف ہے۔ قافلۂ صمود میں مختلف ممالک سے تعلق رکھنے والے درجنوں کارکن، سماجی رہنما اور طبی ماہرین شامل تھے، جو غزہ کے عوام تک ادویات، خوراک اور دیگر ضروری امدادی سامان پہنچانے کے لیے کوشاں تھے۔ یاد رہے کہ اسرائیلی محاصرے کے باعث غزہ میں انسانی بحران سنگین تر ہوتا جا رہا ہے، اور بین الاقوامی برادری کی جانب سے امداد کی کوششیں مسلسل رکاوٹوں کا شکار ہیں۔