ایران-اسرائیل کشیدگی کے شور میں غزہ کی چیخیں دب گئیں، صیہونی درندگی کا بدترین سلسلہ جاری 19 جون 2025 – غزہ، فلسطین گزشتہ دنوں اسرائیل اور ایران کے درمیان پیدا ہونے والی فوجی کشیدگی نے دنیا بھر کی توجہ اپنی جانب کھینچ لی ہے۔ جوابی حملے، میزائل داغے جانے کی اطلاعات اور ممکنہ جنگ کے تجزیے عالمی ذرائع ابلاغ کے صفحات اور اسکرینوں پر چھا گئے ہیں۔ مگر اس شور و غوغا میں سب سے اہم انسانی المیہ — غزہ — ایک بار پھر پسِ منظر میں چلا گیا ہے۔ روزانہ کی بنیاد پر بمباری، گھروں پر حملے غزہ کی پٹی اس وقت ایک کھلی قتل گاہ بن چکی ہے۔ اسرائیلی افواج روزانہ فضائی حملے، توپخانے کی گولہ باری اور ڈرون حملوں کے ذریعے غزہ کے نہتے شہریوں کو نشانہ بنا رہی ہیں۔ خاص طور پر جبالیہ، خانیونس، رفح اور دیر البلح کے علاقے سب سے زیادہ متاثر ہیں۔ ان حملوں میں رہائشی مکانات، مساجد، اسکول، اسپتال اور حتیٰ کہ بے گھر فلسطینیوں کے خیمے بھی نشانہ بنائے جا رہے ہیں۔ امدادی سامان لینے والے شہید غزہ میں خوراک کا قحط بدترین صورت اختیار کر چکا ہے۔ فلسطینیوں کی بڑی تعداد امدادی سامان حاصل کرنے کے لیے مبینہ تقسیم پوائنٹس پر جمع ہوتی ہے۔ مگر ان مقامات کو بھی اب صیہونی گولیوں کا نشانہ بنایا جا رہا ہے۔ کئی عینی شاہدین کے مطابق، محض ایک تھیلا آٹا لینے کے لیے قطار میں کھڑے شہریوں کو براہِ راست فائرنگ کرکے شہید کیا گیا۔ یہ وہ مقامات ہیں جہاں ایک تھیلا آٹا اب انسان کی جان کے عوض دستیاب ہوتا ہے۔ قبرستان بھر چکے، سردخانے ناکافی گزشتہ ہفتوں میں شہداء کی تعداد اتنی بڑھ چکی ہے کہ غزہ کے قبرستانوں میں جگہ ختم ہو چکی ہے۔ سردخانوں میں لاشیں رکھنے کی گنجائش ختم ہو جانے کے بعد فلسطینی مجبوراً اجتماعی قبروں کا سہارا لے رہے ہیں۔ ملبے تلے دبے افراد کی لاشیں کئی کئی دن بعد نکالی جا رہی ہیں، جب وہ ناقابل شناخت ہو چکی ہوتی ہیں۔ عالمی خاموشی اور اسرائیلی جرائم ان تمام مظالم کے باوجود عالمی برادری ایران-اسرائیل تناؤ پر تو توجہ دے رہی ہے، مگر غزہ کے جلتے ہوئے شہر، تڑپتے ہوئے بچے، چیختی ہوئی مائیں اور ٹوٹتے ہوئے خواب ان کے لیے کوئی حیثیت نہیں رکھتے۔ اسرائیلی فوج کی درندگی کھلم کھلا جنگی جرائم کی صورت اختیار کر چکی ہے، مگر عالمی عدالتیں اور انسانی حقوق کی تنظیمیں خاموش تماشائی بنی بیٹھی ہیں۔ --- غزہ چیخ رہا ہے، مگر دنیا کانوں میں انگلیاں ڈالے بیٹھی ہے۔ ایک طرف میزائلوں کی جنگ ہے، اور دوسری طرف انسانیت کا قتل۔