على سيرة التصويت في القلل المتحدة اللي أمريكا كالعادة ضربت واحدة فيتو. *️⃣ عندي قناعة إن دول العالم الأول لقت العالم الثالث عمال يزن كده زي العيل الصغير وصدعهم... وزي أي أخ كبير يلاقي الصغير عمال يزن عاوز العب معاكم عاوز ألعب معاكم فبيعمل ايه؟ *️⃣ بالظبط كده يديله ذراع مش متوصل بالبلاي سيشتن أصلاً ويسيبه يعيش الدور إنه بيلعب ويوهم نفسه. *️⃣ هنا بقى راحوا عاملين لهم القلل المتحدة دي روح أتكلم فيها وعبر عن رأيك بحرية تامة وهاجمني كمان واشتمنى يا عم؛ بس من فضلك لو سمحت هتعبك معايا بس لو ممكن بعد ما تخلص يا ريت تتفضل تاخد الورق اللي عليه كلمتك وترميه مشكوراً في صفيحة الزبالة اللي جنب باب الخروج... معلش آسفين عشان بنوفر نفقات ومش معينين أوفيس بوي. *️⃣ هي دي الدبلوماسية والقلل المتحدة والمنظمات الدولية... لو بصيت لهم إنهم معمولين كده وهما ذراع ألعاب مش متوصل بالبلاي ستيشن؛ مش هنزعل ونقول ليه مش بيعملوا كذا... متبقاش عبيط وتبقى عارف إن ذراع الألعاب مش متوصل؛ ورغم كده تقعد جنب اللي بيلعب دا وتقوله كنت شوطتها في شمال أحسن؛ كلم اللي بيلعب بجد وإلا هنشوفلك مستشفي أمراض عقلية.