BnSamy

صباح الخير *️⃣ النهاردة اجتماع البنك المركزي اللي بيحدد فيه سعر الفايدة؛ دا أول اجتماع في 2025 ومتوقع جداً يتم تخفيض الفايدة اليوم وشخصياً متوقع انخفاض 2% ليصبح فايدة 25.25% ايداع و 26.25% إقراض بمتوسط 25.75%. وخلال 2025 متوقع متوسط الفايدة تنخفض لتصبح في رينج من 18-20%. *️⃣ لو قرر المركزي نهاية عصر الفايدة المرتفعة اليوم وبداية سلسلة التخفيض فمتوقع ان بنكي الأهلي ومصر ينهوا الشهادات المرتفعة وهي تحديداً شهادة 3 سنين (30/25/20) وشهادة السنة (27% سنوي /23.5 شهري/ 23% يومي) وشهادة ال 3 سنين ذات العائد 27.5% صرف ربعي... ونبدأ نشوف شهادات أقل وتدريجي مع كل تخفيض قادم. *️⃣ اللي هيساعد المركزي عالقرار دا ان التضخم القادم (يعلن 10 مارس) متوقع 19-20% ثم 10 أبريل مزيد من الانخفاض ل 16-17% ثم مايو رينج 15%. *️⃣ كمان من اللي يساعد الدولة هو انخفاض فائدة اقراض الحكومة؛ يعني شهر ديسمبر كانت الدولة بتقترض صافي (بعد خصم 20% ضرايب) بفايدة 25% أصبحت 22% متوسط ال 3 أسابيع الماضية ودا للاقتراض القصير 3 شهور... والآجل سنة بقى 20% كمتوسط صافي ضرايب. تخفيض الفايدة بيكون شيء إيجابي عالاقتصاد لعدة أسباب: 1️⃣ تقليل عبئ الدين عالدولة: دلوقتي البنوك بتحط فلوس اسبوع عند المركزي يوم الثلاثاء بفايدة 27.75% (عمليات السوق المفتوح) فلما تقلل الفايدة والبنوك تحس انها هتنزل أكثر هيروحوا للاذون بشتروها عشان يربطوا الفلوس مدة أطول؛ زيادة العرض هيقلل الفايدة المقبولة... مصر بتقترض 130-150 مليار جنية أسبوعياً فتخيل تأثير أي 1% تقليل. الشهر القادم متوسط ارتفاع المتوسط الاسبوعي ل 175 مليار لسداد الالتزامات. الدولة أكبر مقترض وبتوصل ل 4500 مليار سنوي اقتراض متنوع فحركة الفايدة مهمة. 2️⃣ تقليل العبئ عالشركات: كل الشركات الكبيرة بتاخد قروض لتمويل مشروعاتها؛ كلها بمعنى كلها مش مبالغة؛ فكده تكلفة الديون تقل فتكلفة السلع تقل عالشركات فدا يؤدي الي تقليل رفع الأسعار وكمان يشجع الشركات على زيادة الاقتراض والتوسع. 3️⃣ حركة سلع والسوق: معظم الشركات والمتاجر اللي بتتعامل مع الجمهور هتلاقيها بتوفر خدمات تقسيط؛ التقسيط يعني فوايد؛ مفيش تقسيط بدون فوايد؛ حتى لو شوفت اعلان قسط علي 6 شهور بدون فوايد مع بطاقة بنك X فاعرف ان التاجر هو اللي هيدفع الفوايد بدالك للبنك... طيب التاجر هيجيب دي منين؟هيحملها على سعر السلعة؛ فلما الفوايد تقل يبقي التقسيط هيبقي عبئ أقل يبقي تكلفة أقل تتحمل عالمنتجات. وحتى التقسيط بفوايد مع Valu وأمان وغيره هتقل الفايدة فدا يشجع ناس أكثر تشتري فيعمل حركة أفضل في السوق. ⬅️⬅️ توضيحات: 1️⃣ *الفوايد دائماً تذكر* سنوي يعني لما نقول قروض 3 شهور بفايدة 22% فدا معناها السنوي 22% تقسم علي 4 بقي يطلع 5.5% لل 3 شهور... نفس الحكاية لما نقول شهادة 23% يومي فهنا مقصود الفايدة السنوية 23% يعني لو شهادة ب 100 الف جنية يبقي 23 الف سنوي يبقي يومي 63 جنية. 2️⃣ *الرواتب والبنزين والتضخم* زيادة الرواتب بتزود التضخم دا صحيح؛ بس تأثيرهم لا يذكر؛ يعني لو قولنا التضخم مفروض ينزل الشهرين القادمين 10% فتقولي بس المرتبات هنزيد؛ خلاص زيادة المرتبات ترفت 2% فدا يخليهم 8% بس انخفاض؛ وزيادة البنزين اللي بعد العيد الصغير ترفع 1% كمان يبقي 7% صافي انخفاض... فالتضخم نازل نازل والاجراءات اللي بتتاخد دي بتقل كم الهبوط مش أكثر. 3️⃣ *مش من تخفيض واحد* لما فوق قولت التخفيض هيقلل عبئ الدين عالحكومة والشركات ويسهل التقسيط ووو؛ فالمقصود هنا سلسلة تخفيضات؛ مهواش تخفيض 2% هيعمل دا كله؛ لكن تخفيض 2% النهاردة ثم 1% في 17 أبريل ثم 2% في 22 مايو ووو دا يؤدي إلى ما هو مذكور... توضيح لابد منه للي بيحبوا الأفورة ⬅️⬅️⬅️ ممكن ميخفضش *️⃣ في آراء كثير بتقول ان المركزي هيثبت الفايدة لغاية ما يشوف أرقام تضخم فبراير ثم مارس. يبدأ التخفيض من 17 أبريل مش النهاردة... الآراء دي معتمدة على نقطة إن المركزي المصري طبيعته إنه حريص جداً بيتحرك براحة في الهبوط وبسرعة بالصعود... كمان يستني المركزي التركي منافسه في الهوت ماني لما يخفض (45% الفايدة في تركيا) فنظام استني شوف تركيا وشوف الفايدة في مصر وشوف زيادة الرواتب هتعمل ايه وبعدين ياخد أكشن.. فتوقع التثبيت معتمد علي فكرة اننا في مصر بنحب Slow Motion ورانا ايه يعني. *️⃣ للتذكير مصر عندها اذون وسندات مستحقة من النهاردة لغاية اجتماع المركزي القادم بتاع ابريل حوالي ترليون جنية؛ ترليون يعني 1000 مليار جنية؛ فالحكومة هتستلفهم عشان تسددهم؛ فلو فضلت الفايدة عالية فالأذون والسندات هتطلع والحكومك تستلف الترليون بالعالي. فيا تري ايه هيحصل؟ هل ال Slow Motion هينتصر كالعادة؟ ولا نمسك العصاية من النص 1% ⬅️ بفكر أعمل لايف ساعة في القناة الوليدة المهجورة مني اليوتيوب؛ تيجوا نعملها النهاردة بالليل؟ ننشط شوية الظهور؛ ايه رأيكم ولو هنرغي يبقي موضوع ولا أطلع أرد على اسئلة؟

خواطر ودردشة بصوت عالي *️⃣ في أغنية زهرة المدائن الشهيرة قالت فيروز (حين هوت مدينة القدس؛ تراجع الحب وفى قلوب الدنيا استوطنت الحرب) وقبلها كانت قالت (استشهد السلام فى وطن السلام وسقط العدل على المداخل) بالرغم إن مفيش علاقة بالأغنية وزمنها بالحاضر بس الاغنية دي عمالة ترن في ودني؛ بحس العالم مع الوقت هيقتنع بإن السلام دي خرافة؛ وفي قلوب الدنيا استوطن الحرب. *️⃣ بعد الحرب العالمية الثانية بدأت شعوب العالم الثالث بالتحرر الشكلي من الاستعمار؛ في حد عرف يلعب في عقول الشعوب وقتها وقالهم في خرافة اسمها السلام؛ هدفكم السلام.. والشعوب صدقت من وسط آسيا لأفريقيا لأمريكا الجنوبية. *️⃣ اشتروا وهم اسمه السلام؛ واشتروا معاه سلاح كثير من الغرب؛ وعشان يحموا نفسهم ادوا الغرب نفس نفوذه اللي كان واخده وهو محتل... والغرب بقي ييجي لك؛ أيوا بص هحميك وهوفر لك السلام بس معلش هناخد السرير عندك من الأوضة مقابل حمايتي؛ معلش هناخد الكنبة؛ معلش السفرة؛ معلش السجادة؛ وكل شوية دول العالم الثالث تصدق وتديله عشان هي عاوزة السلام. *️⃣ بعد عقود خلاص بقى العالم الثالث قاعد ع الأرض محلتوش حاجة؛ فالغرب بقى يروحله يقوله ماشي هديك السلام بس انتا مش معاك حاجة؛ خلاص انتا عندك عيال كثير هاخد واحد قربان يشتغل عبد عندي وهسيبك لك الباقي تعيش بسلام... وبرضك وافقت الشعوب. *️⃣ من سنة رئيس فرنسا ماكرون في زيارة لأفريقيا يتريق علي فقر القارة؛ وانهم عالة على فرنسا؛ مهما خلاص بقوا عالبلاط وعيالهم جم فرنسا مواطنين درجة 3... بعد ما سرقوا الشقة بيسخروا من فقرك. *️⃣ العالم الثالث بيقدم لسه تنازلات للعالم الأول؛ بس المرة دي معندوش لا عفش بيت ولا حتي عيال؛ فدلوقتي جه الدور انهم ياخدوا مراته لفة؛ خلصت التنازلات في الفلوس؛ جه وقت التنازلات في الشرف. *️⃣ المضحك انهم ضحكوا علينا وقالوا دينا قال كده؛ لإنه قال (وإن جنحوا للسلم فاجنح لها وتوكل على الله) مع إن الأيه بتقول عكس ما اشتريناها؛ الآيه بتتفهم إنك في حالة حرب لكن لو هما طلبوا السلام فأوكي سلام لكن مش عاوزين خلاص نرجع لل default mode وهو الحرب.. هما اللي يطلبوا السلام مش إحنا؛ هما اللي ان جنحوا مش إحنا. *️⃣ لا ويقولك لازم السلام عشان الحرب بتدمر والسلام رخاء؛ صح والله واضح كده رخاء دول العالم الثالث اللي عايشين فيه؛ورينا كده عالم ثالث وحال مواطنيه؛ كلمني عن أمريكا الجنوبية؛ طيب افريقيا؛ طيب وسط وجنوب شرق آسيا... طيب ورينا الأشرار اللي في حروب أمريكا انجلترا فرنسا روسيا الخ الخ؛ أكيد مواطنيهم ماتوا من الجوع أصل الحرب بتدمر. ⬅️ فلا من دول العالم الثالث عاشت برخاء ولا هي ماتت بكرامة مرفوعة الرأس؛ لإن ببساطة السلام اللي تديه هتحصل على سلام قصاده؛ لكن السلام اللي تطلبه من الآخر هتحصل على ذل قصاده.

هي المعونة الأمريكية دي يعني هتضايقنا قوي؟ *️⃣ طبعاً انتم عارفين إني بتجنب أي حديث عن السياسة لأسباب معروفة للجميع بس تعالوا استثناء نقرب شوية في سطرين ونبص هي المعونة الأمريكية اللي بيلمحوا بيها دي تضلعنا يعني؟ *️⃣ عارفين دخل مصر الدولاري الطبيعي كام؟ جمع معايا كده 40 صادرات + 32 تحويلات مصريين + 15 سياحة + 5 تعهيد + 10 قناة السويس (في الظروف الطبيعية) + 7 أخرى زي استثمارات = نقول 100-110 مليار دولار. *️⃣ طيب مصروفات مصر الدولارية كام؟ الاستيراد 80-90 مليار دولار + سفر وعمرة وحج 2-3 مليار دولار + خدمة دين 30 مليار دولار مثلاً + 5 تحويلات أرباح = 115-120 مليار دولار تقريباً. *️⃣ الحسابات دي الحسابات بالحب كده البلدي تقرب المعنى كده... فاحنا نقول كده احنا دولة بيدخلها 105 مليار وبتصرف 120 مليار كل سنة... عارفين بقى المعونة الأمريكية كام؟ 1.5 مليار دولار. *️⃣ اه بجد السنة اللي فاتت كانت 1.44 مليار دولار... احنا السنة الماضية فقدنا 5-6 مليار دولار من دخل قناة السويس بسبب المشاكل اللي في المنطقة... فالرقم مش معضل خالص... مصر بند الطاقة بتاع استيراد الغاز هنجيب 160 شحنة غاز مسال في 2025 دول لوحدهم 8-9 مليار دولار... دول مثلاً عشان نفك اسالتهم مأجرين 3 سفن ب 500 ألف دولار يومياً إيجارهم بس بدون الغاز. *️⃣ الرقم ك رقم مش هيضرك في أي شيء لكن مش معنى دا إنهم مش هيفرق معانا. *️⃣ الفكرة في المعونة الأمريكية وزيها برضك اتفاق صندوق النقد؛ إنهم بيقولوا إن بلطجي الكوكب راضي عني أو عالأقل مش زعلان معايا. دا بيطمن الهوت ماني وبعض المستثمرين فييجوا. هنا بقى الخوف؛ مش على ال 1.5 مليار بتوع أمريكا؛ لكن على ماذا يعني إنك مغضوب عليك. *️⃣ لو بقى إنتا قدرت تقنع المستثمرين إنك زي الفل ومظبط أمورك... فهنا بقى المليار وشوية دا يلفوهم وخد يا ترامبو... لكن عامة أمريكا هتدفع؛ دي أمور تبع اتفاقية السلام ولازم تتدفع؛ هما مستفيدين منها أكثر مننا ومش من مصلحتهم يضحوا بيها. ⬅️ فمن الآخر انتا وشطارتك بقى في ترتيب أمورك.

🙄🙄🙄

الأيام الماضية بنك CIB خفض الفايدة 3% وبنك QNB خفضها 1% وكان بنك EG خفض الفايدة 1.5% *️⃣ ايه يا بنك اهلي انتا وبنك مصر؛ يلا بقي الغوا شهادات 27% و 30/25/20 دول وانزول بالفايدة؛ ولا هو لازم ننتظر لغاية يوم 20 فبراير لما المركزي يخفض الفايدة 2-3% عشان تتحركوا وتلغوا الشهادات دي. *️⃣ عامة يوم الاثنين بعد بكره هيعلنوا انخفاض التضخم ثم بعده ب 10 أيام المركزي هيخفض الفايدة 2% وربما بكون شجاع ويخفض 3%... وبعدين يوم 10 مارس نعلن التخضم تحت 20% لاول مرة ثم 10 ابريل ينخفض كمان ويروح المركزي مخفض 2% كمان زي بتوع فبراير في 17 أبريل. زمن الشهادات المرتفعة والفايدة العالية خلاص كده... يلا بقي خلوا السوق يصحي وتكلفة الفرصة البديلة تقع

خطوة حلوه جداً *️⃣ جهاز تنظيم الاتصالات هيستغل منظومة IMEI وهيقفل التليفونات اللي بتستخدم في التسويق العقاري بدون التسجيل في الجهاز. *️⃣ دا عشان المسوقين بقوا يغيروا الشرايح اللي بيعملوا المكالمات منها؛ ميعرفوش ان المكالمة بيتسجل الرقم و IMEI بتاع الجهاز اللي طالعه منه. فكده الجهاز هيقفل لهم الموبايل دا أصلا؛ يغيروا شريحة ويغيروا موبايل بقي. *️⃣ الجهاز قال إن في 35 ألف رقم تليفون اتسجلوا عنده ك مسوق عقاري... وبكده بقى لو حد اتصل بيجي لك رسالة توضح ان دا دعاية فعاوز متردش يبقي متردش. *️⃣ لو متعرفش إزاي تبلغ فنزل ابلكيشن MyNTRA وقدم بلاغ منه لو جالك مكالمة دعائية ومظهرش ان دي دعاية (ظهر في التليفون مش ترو كولر) اشتكيهم... وممكن تشتكي من الموقع بتاع الجهاز برضك. *️⃣ وحاجة علي جنب؛ احنا عندنا دلوقتي 35 ألف رقم مسجل ك نشاط تجاري مسوق عقاري غير الالاف انشطة أخرى؛ تخيل بقي تخيل الأرقام دي تروح لجهة بنحبها كلنا يتابع معاهم؛ انتا بتمارس نشاط تجاري؛ فين اقرارك الضريبي عن النشاط دا 😁... أنا بقولك تخيل يا عم تخيل مبقولش دا هيحصل 🫣. *️⃣ تخيل كده الضرايب بييجي لها داتا عنك من التليفون؛ ومن الكهرباء ووو وبعدين تقولهم مش شغالين... وكنت بتعمل المكالمات دي وبتستهلك كهرباء وماية وغاز ووو لمقر الشركة بدون عمل لسنوات 🤔🤔 بتعذب الموظفين وبتكهربهم وبتدفع لهم رواتب صدقة. وكل دا بقولك تخيل مبقولش خالص إن الداتا دي بتتجمع حالياً... دا تخيل 😢😢.

لما تيجي تبص على المهاجرين والعمالة الأجنبية أو زي ما بنسميهم في مصر اللاجئين في العالم كله، تلاقي موجة عنصرية عالمية ضدهم... مع إن الكل مستفيد منهم أصلاً. *️⃣ بداية من أمريكا، تلاقيهم بيستغلوا اللاتينيين والمكسيكيين ويشغلوهم برخص التراب وفي مهن صعبة أو محتاجة مجهود، زي الزراعة والبناء؛ ويا سلام ده لو هربان وورقه مش قانوني، يشتغل أرخص. *️⃣ تروح أوروبا تلاقي نفس الحوار بالضبط؛ دول منتشر فيهم الغير رسميين ويشتغلوا بمبالغ زهيدة، وفي دول زي ألمانيا وإنجلترا بتستفيد من عجز قطاعاتها، زي الطب مثلاً، عبر جذب الأطباء الشباب من تركيا والشرق الأوسط... بدونهم قطاعات كاملة تنهار. *️⃣ في الخليج مش محتاجين نتكلم عن 5 جنسيات شايلة الخليج؛ الهنود ثم المصريين ثم الباكستانيين ثم الفلبينيين ثم البنغلاديشيين. بتلاقي عنصرية ضدهم برضه، لكن أقل بكثير ولا مقارنة مع الأوروبيين. تفتكر الخليج كان هيتبني بالشكل ده بدون أجانب؟ *️⃣ يا أخي، حتى في مصر بنعنصر ضد السودانيين والأفارقة اللي ورقهم مش رسمي، وبعدين تروح تلاقي في نفس الوقت شركات صغيرة وحاجات زي الورش ومغاسل السيارات تستغل الناس دي وتشغلهم برواتب قليلة جداً. *️⃣ من الآخر، الكوكب ده قاعد يجيب الأجنبي يشغله في مهن يرفض ابن البلد يشتغلها أو محتاج راتب كبير، ولو لقى الأجنبي ده ورقه مش سليم؛ يا سلااااام، فرصة وجت لغاية عندي، اسحقه وأشغله أرخص، ده معهوش إقامة وهربان من المكسيك أو كاسر فيزا في الخليج أو لاجئ هربان من حرب. *️⃣ تشغيل الناس دي بيخليك تاخد منه شغل قيمته X وتدفع له ربع X، فبيزود دخل أصحاب الأعمال والاقتصاد، تخيل كده شركة في الخليج 100% من عمالتها مواطنين، هل تقدر تستحمل التكلفة؟ نفس الحكاية في أوروبا وفي أمريكا. *️⃣ فالدول بتستفيد منهم وترمي لهم الفتات، حتى اللي شغالين رسمي نادراً ما بياخدوا رواتب زي ابن البلد، وبعد ما ترمي لهم الفتات تستغلهم بقى سياسياً في خصومات، وتلاقي ترامب في أمريكا وأحزاب اليمين في أوروبا، وحتى حصلت دعوات ضد المصريين برضه في بعض دول الخليج من عنصريين زي (تصحيح صفاء الهاشم) زمان في الكويت... *️⃣ مع إن الأجانب دول إما مستثمر جاي بفلوسه فمفيد للدولة، أو ذو مهارة فمفيد زي المصريين في أوروبا، وخاصة الأطباء مفيدين للدول هناك، وحتى المهاجر غير الشرعي هتستفيد منه شغل ببلاش، ولو بقى ليه صفة لاجئ وأخذ الكارنيه الأصفر، هيدخل للدولة ملايين ومليارات الدولارات مساعدات على حس اللاجئين فيها. *️⃣ فبقعد أشوف ترامب وهو بيقولك "ارحلهم"، والأحزاب اليمينية في أوروبا نفس الكلام؛ إيه يا ولاد التيت؟ ما اقتصادكم أصلاً معتمد عليهم، ومش عاوز أقول إن الناس دول مجوش أصلاً عندكم غير عشان دولهم مدمرة، وغالباً أنتم يا أوروبا وأمريكا ليكم دور كبير في الشكل والفقر اللي وصلت له دول الناس دي... *️⃣ سرقتوا مواردهم ومولتوا حروب في دولهم عشان تخدم مصالحكم، وبعدين الناس هربت وجت عندكم، استغلتوهم وشغلتوهم بالفتات، وبعدين سخرتم منهم وبتهاجموهم وتعنصروا ضدهم... أما جنس أبيض غربي عنده مبادئ تيت صحيح.

إزاي بييجي لي فكرة البوستات؟ *️⃣ من يومين شركة ميتا أعلنت إنها رصدت عمليات تجسس على الواتس آب بتم بواسطة شركة إسرائيلية تسمى باراجون وإن عملية التجسس دي استهدفت 90 مستخدم؛ موضحتش ميتا أي تفاصيل عنهم ولا دولهم لكنها قالت انها طلبت من الشركة الإسرائيلية التوقف عن الاختراقات 😁... ووضحت ميتا إن الاختراق تم بواسطة تقنيات zero-click يعني مفيش لينك هيتبعت لك وتدوس عليه؛ لا خالص دا ملف هيتبعت لك PDF وشكراً خلاص مش محتاج منك حاجة. *️⃣ حتى الآن الخبر خلص؛ دا الخبر زي ما هتقراه في أي مكان تقني؛ هيقولوا بعض تفاصيل عن الشركة والحدث ووو؛ طيب أنا لو عاوز أكتب بوست طويل عن الموضوع دا أعمل ايه؟ يلا بينا؛ خد بالك البوست دا هشرح فيه بمثال أنا فكرت إزاي؛ حاجة كده اكنك مشغل DeepThink في DeepSeek؛ فلو حسيت انك فصلت معلش؛ مش هكررها تاني بس قولت فكرة جديدة جت لي. *️⃣ مين صاحب الشركة دي؟ مش ممكن واحد من مؤسسيها هو إيهود باراك رئيس وزراء اسرائيل الاسبق 🤔؛ طيب ما نحكي للناس شوية عنه وعن كفاحة؛ هو ابن... بس شق طريقه طويل. *️⃣ بداية من إنه خدم بالصاعقة وكان ضمن عمليات اغتيالات شهيرة وأهمها فردان لما تسللت فرقة اسرائيل عبر البحر الي لبنان ورصدت تحركات ابو يوسف أحد اهم قادة حركة ايلول الأسود وقائد عملية ميونخ الشهيرة... وكمال عدوان اللي كان رقم 3 في منظمة التحرير؛ وكمال ناصر الناطق باسم المنظمة. *️⃣ أثناء تنفيذ العملية دي اتنكر ايهود باراك في زي واحدة ست؛ وبالفعل تم للاسف اغتيال القادة الثلاثة واستشهدوا مع بعض افراد الأمن اللبنانيين... وصعدت اسهم باراك ويقال انه شارك او خطط لاغتيال ابو جهاد في تونس؛ وفضل يترقي لغاية ما ساب الجيش. *️⃣ انتقل للحياة المدنية وبصراحة كان وشه حلو قوي؛ يعني مسك وزير داخلية؛ اتقتل رئيس الوزراء اسحق رابين 😁؛ عملوا حكومة مؤقته ومسكوه وزارة الخارجية؛ الحكومة انهارت... بعد شوية عرف يكسب ومسك أهم منصبين مدنيين في اسرائيل وهم رئيس الوزراء ووزير الدفاع؛ اسرائيل مينفعش ظابط جيش يمسك وزارة الدفاع؛ لازم يقعد شوية مدني ويشوف مناصب مدنية. *️⃣ المهم بقي هو فشل في الاثنين 🤣 مظاهرات غرقت البلد من مواطنيه ومن الفلسطنيين؛ والمنصب الثاني الدفاع؛ حصل ضرب في لبنان وحزب الله أجبر الجيش الإسرائيلي على الانسحاب... فشله خلى الليكود بقيادة شارون سحقه في الانتخابات 2001... *️⃣ المهم فضل يكافح برضك مسكتش واستغل في يونيو 2007 ان في شقلباظات وحماس سيطرت على غزة وطردت فتح؛ قالهم حماس دي عاوزة راجل يقفلها؛ فهوبا جابوه وزير دفاع 2007 وبالفعل شن حرب ضخمة نهاية 2008 استمرت 3 اسابيع لكن فشل؛ اللي قديم شوية يفتكر صورة زميلته بالحكومة تسيبي ليفني وهي بالقاهرة عالسلم ماسك ايديها ابو الغيط؛ هي الحرب دي. *️⃣ المهم يعني دي كانت قصة ايهود باراك... حلو البوست يا بن سامي؛ امممم لا برضك ما تيجي نكبر البوست؛ بس نكبره ازاي نكبره ازاي؛ ايوا صحيح نحكي برضك قصة النتن حصلت إزاي... *️⃣ سنة 1976 منظمة فلسطينية خطفت طيارة عليها اسرائيلين ونزلت في اوغندا؛ وهنا حركة اسرائيل قوات الكوماندوز وهجموا الطيارة؛ قتلوا الخاطفين ال 7 وقتلوا بتاع 30 او 40 من الجيش الاوغندي ودمروا 15-20 طيارة اوغندية وحرروا 102 رهينة من ال 106... وراح للكلاب فطيسة واحدة وهو يوناتان نتنياهوو... ايوا اخوه الكبير. *️⃣ العملية تعتبر من انجح عمليات تحرير الرهائن بالقوة فالصحافة هناك قعدت ترقص وتغني؛ وتعيط عالبطل اللي فطس؛ وطبعاً يكلموا اهله وأصحابه وكان علي رأسهم اخوه اللي بيدرس في MIT ماساتشوستس واخد شوية دراسة في هارفارد؛ الأخ بنيامين اللي كان بيتخرج وقتها وقعد يحاول يشتغل في أمريكا بس قالك هو أنا اقرف نفسي ليه. *️⃣ شوية واخد ديلة في سنانه ونزل فلسطين المحتلة وقعد يعيط؛ اخويااااا؛ واستغلها في حملات دعائية وألف كتاب ووو.. بس يا سيدي وبقي النتن اللي كلنا شامين ريحته. *️⃣ حلو البوست يا بن سامي طويل؛ طيب ما نطوله زيادة؛ بس ازاي إزاي؛ اشوف حد تاني احكي عنه؛ لا مينفعش مش مترابطة؛ الشركة وصلتنا لايهود باراك اللي وصلنا للنتن واخوه اللي فطس؛ اااه تصدق فكرة؛ ما عملية اخوه دي اشوفها كانت ملهمة لمين. وجدتها. *️⃣ بعد عملية عنتيبي بسنتين وتحديدا سنة 1978 سافر وزير الثقافة المصري وصديق السادات العميد والأديب الشهير يوسف السباعي (شايف الحته دي؛ كثير ميعرفوش ان يوسف السباعي كان وزير ثقافة؛ وبرضك كثير ميعرفوش انه كان في الظباط الأحرار يعني لما ألف فيلم رد قلبي كان يعتبر زميلهم بيحكي؛ الرفايع دي بقي لما تحشيها في البوست بيكون لذيذ).. *️⃣ المهم يوسف السباعي سافر سنة 77 مع صديقه السادات الي الكنيست وبناء عليه الجماعات الفلسطينية اعتبرته خائن؛ وبالفعل تم رصد سفره إلي قبرص وقاموا بالهجوم وطاخ طاخ اتقتل يوسف السباعي؛ خطفوا 40 رهينة وعاوزين طيارة؛ جابوا طيارة ولفوا محدش عاوز ياخدهم فرجعوا قبرص. *️⃣ السادات غصب لاغتيال صاحبه وأمر بالهجوم عالطيارة؛ تم خداع قبرص وايهامها ان مصر هتبعت طيارة شايلة وزير للتفاوض مع الخاطفين؛ لكن هوبا قبرص لقتها طيارة عسكرية؛ الرئيس القبرصي كان بنفسه في المطار بيتابع الازمة؛ القوات المصرية تجاهلت وجود الرئيس والحرس الجمهوري وبدأت الهجوم واتضرب الرصاص عالرئيس القبرصي في برج المراقبة؛ الجيش القبرصي قام بالهجوم العنيف عالقوات المصرية. *️⃣ بعد ساعة من القتال كنا خسرنا 15 من قواتنا وفي 15-20 مصابين والطيارة اتدمرت والعربية العسكرية اللي هجمنا بيها اتدمرت وتم القبض على القوات المصرية المتبقية... الطرف الاخر اتصاب 8 من الجيش القبرصي والخاطفين لما لقوا الموضوع كبير سلموا نفسهم. *️⃣ مصر بعتت بطرس غالي إلي قبرص وبالفعل قررت قبرص اعادة كل الجنود إلي مصر وإعادة سلاحهم ليهم منعاً للدخول في مشاكل مع مصر؛ لكن بمجرد ما الطيارة اللي شايلة الجنود غادرت قبرص أعلن السادات سحب اعترافة بدوله في الكوكب اسمها قبرص وأمر بطرد السفير القبرصي وقطع كل العلاقات؛ واستمرت القطيعة إلى أن اعادها مبارك. *️⃣ بس يا سيدي وهو دا كان البوست... ودي طريقة التفكير اللي بستخدمها؛ معظم المعلومات دي عارفها مسبقاً بس عادي لو مش عارفها هخش أدور؛ لكن النقطة المهمة مش إنتا تدور إزاي؛ المهم تدور على ايه؛ فالموضوع بيكون انك مش بتاخد الخبر وتعديه؛ لا خالص إنتا بتسأل نفسك هو مين دا؛ ايوا ايه؛ إزاي؛ فين... وتبحث ونقطة تاخدك لنقطة وهكذا. مع تحيات بن سامي وهو عايش في دور الذكاء الصناعي 🤣

البودكاست دا اتصور من شهرين؛ وكان ابو زيد حاضر فيه بالخلفية قاعد يعني بيحضر التصوير؛ شاهين صبر كثير عشان ينشره وبعدين مونتاج وتم النشر. بصراحة أحلى حاجة في البودكاست هو شريف مش أنا. أنا كنت جاي أهزر واتكلم عن الثلاجة والجبنة 🤣🤣 هتشوفوا قصدي لو حد شاف البودكاست... إنتي جايه تشتغلي ايه 😁. لكن شريف ما شاء الله كان رائع في البودكاست وبتعلم من شريف دايماً 😍😍 https://youtu.be/OSLAXkkl0Q0?si=0IgpWpuFLBjU0JPj