BnSamy

إمبارح نزلت عاليوتيوب أول محاولة ليا لعمل فيديو قصير 6 دقايق تخيلوا 🤣 بن سامي يتكلم 6 دقايق بس 😁 *️⃣ الفيديو أنا كاتب الاسكربت مش برتجل كالعادة فتحسوني روبوتي شويتين 😓😓 *️⃣ الفيديو غير اقتصادي وبتكلم فيه عن عملية إغراق المخ بالكثير من المحتوى بشكل مستمر وتأثير دا علينا *️⃣ منتظر رأيكم في أول تجربة لفيديو وربنا يكرم والفيديوهات الاحقه هتبقي أفضل إن شاء الله https://youtu.be/xU1ufz7gXE0

حاسس إني الوحيد اللي لسه مقولتش رأيي في موضوع عسل النحل والاختبارات والغش وكده... بس خلوني أقول كام نقطة كده من منطلق تفتيح الأفكار. *️⃣ تعرف إن في مواد كيميائية وطرق معالجة بتم عشان تقلل نسبة السكروز؟ يعني لو فاكر ان تحليل يقولك نسبة السكروز كده شاطر؛ عاوز أقولك بلح؛ اللي عاوز يغش بجد عادي بيحط مواد كيميائية تقلل الرقم وتخليه اللي نفسك فيه. *️⃣ طيب تعرف إنك لو حللت العسل وطلع الرقم بايظ حسب الفيديو ليكن 6 ولا 8... وبعدين قولت ايه العسل دا مضروب فركنته في المطبخ عندك؛ المهم يعدي شهور ولا سنة ولا اكثر ييجي اخوك ياخد عينه ويروح بحلل ممكن يلاقيها بقي 4 ولا 3 كمان 😁... ايوا السكروز بيقل رقمه مع مرور الوقت والزمن. فمش معني انك لقيت رقم ما انه كان كده وقت الانتاج... طبعاً دا لو الشركة مش هتلاعب وتسخن وتضيف مواد وشكل كارثي. *️⃣ عارف لما بتكون عيان وتروح تعمل تحاليل؛ ويكون في حاجة حيوية وهيتاخز عليها اجراء قوي زي عملية وكده او مرض خطير؛ الدكتور بيقولك تعالي نعمل التحاليل تاني في مركز تاني وممكن ثالث بحيث يقطع الشك باليقين؛ طيب ليييه؟ عشان انتا لو عملت تحليل النهاردة وكررته بكره في نفس المكان ممكن تطلع نتايج مختلفة؛ اه مفروض هيكون مفيش فارق كبير بس مهواش رقم قطعي ثابت؛ يعني مش فيزياء هتقيس طول عمارتك النهاردة وتقيسها بكره تلاقيها كما هي؛ لا بتتغير حسب الجهاز وحسب اللي شغال. *️⃣ النقاط السابقة دي مش سر؛ عشان كده بيعملوا ايه لما يحبوا يفحصوا عينات؛ مش بيدخل علي مصنع لبن ولا مصنع عسل ياخد عينه واحدة؛ لا بياخد عينات متعددة وبيفحصوهم اكثر من مرة في أكثر من مكان؛ بحيث يتفادى هامش الخطأ البشري والمعملي؛ لو اخد مثلا 20 عينة من أمكان واوقات مختلفة لقي 15 بايظين كده خلصت؛ لكن لو اخد واحدة وكان في سوء تخزين مثلا؟ لكن مش هيطلع في سوء تخزين بال 20 عينة؛ وهكذا كل العينات لما تزيد تقلل احتمالية الخطأ... *️⃣ نقطة كمان وهي الأجهزة المتطورة؛ العلم بيتطور والمعايير يعني في العسل في طرق بدائية بتقيس inverted sugar و additive sugar في العسل مثلاً غالبا وقفوها من ايام الملك فاروق بس لسه مستخدمة في مصر؛ وفي تقنيات حديثة زي دقيقة زي أجهزة الطيف والقياس بال Isotope C13 أو HMF أو NMR وكذلك البصمة FTIR / FT-NIR بحيث يضمن نتائج دقيقة جداً. *️⃣ أصلك لما هتيجي تصدر عسل مثلاً للاتحاد الأوروبي ولا السعودية والإمارات مش هيخش هو في لعبة أصل دي مادة كيميائية وفارق معامل ويبقوا هما وشطارة المصدر بيعرف يخدع التحاليل أم لا؛ لا حضرتك فحص زي FTIR / FT-NIR بيكشف البصمة الطيفية للعسل؛ كل مادة في الدنيا ليها لون طيفي ودا يقدر يفحص يعرف النوع... وفي تحاليل زي نظير الكربون C13 يكشف لك حتي لو نسبة الغش قليلة قوي. *️⃣ أيام الدراسة اللي مكنتش سالك فيها 🫣🫣 كان في مواد كيميائية تسمي كواشف؛ دي فكرتها ايه؟ في مواد بتكون حساسة قوي لمواد معينة لو شافتها لونها بتغير؛ فكنا نعمل التجربة ونشوف بقي درجة اللون... دي الطريقة مع التبسيط اللي شغالة بيها التحاليل البسيطة للغش التجاري؛ احنا شاكين ان في سكر مضاف additive sugar نروح نجيب مادة تانية بتتفاعل معاها لما تشوفها تتحول للون مميز أحمر او أسود مثلا؛ وعلى أساس شدة اللون يبقي الغش. هنعتمد عالنظر بقي 😁. *️⃣ لكن التحاليل الطيفية مفيهاش الكلام دا دي بترصد الطيف اللوني؛ انتا لو حاطط 1% مضروب و 99% سليم هنكشفه؛ دا لو فكرت تخلط عسل طبيعي 100% بنوع تاني ارخص وبرضك طبيعي 100% فالفحوصات المتقدمة دي تكشف لك نوع الزهرة 😁... بص مفيش مهرب منها ومفيش نقاش واحتمالية الغلط والقيل والقال وأصل ومش أصل... دا اللي بيعتمدوا عليه في أوروبا والخليج مش التحليل الكيميائي اللي يعتبر غير دقيق وكمان ممكن تخدعه. *️⃣ آخر شيء هو متاخدش البوست إني بقول الفيديو المنتشر سليم أو بايظ أو التحاليل سليمة ولا لاء.. أنا بشرح الكوكب شغال إزاي وبالمرة شرحت نقاط زي تغير نسبة السكروز مع الزمن فاللي طلع وحش ونسبة سكروز عالية؛ لو كنت جايب منه انتاج قديم سنة كان ممكن يطلع النسبة سليمة 😁. *️⃣ في النهاية حابب بس أقول ان أصعب مجال هو الاغذية؛ مش سهل خالص والغش فيه معقد وكشف الغش صعب؛ أذكر إن صديق عزيز واستاذ لي حكي لي زمان إنه عشان يفتح فرع لشركته الغذائية في دولة أوروبية قعد سنة ونص من شدة التعقيدات والرقابة على دخول الغذاء لأوروبا. فلو الموضوع سهل في لحظة تقدر تكشفه بلحظة مكانش حد غلب.

صباح الخير مجرد معلومة على جنب من تحضير فيديو من سلسلة فيديوهات التضخم. *️⃣ تعرفوا إن التضخم في مصر بيتحسب بناء على دراسة (الدخل والانفاق) اصدار 2017/2018 ولم يتم تحديث الداتا حتى الآن؛ يعني مع كل التغيرات الاقتصادية الاجتماعية من كورونا ثم 3 تعويم اللي غيروا خريطة انفاق الأسر كلياً *️⃣ لكن لسه شغالين بشكل انفاق الشعب والبنود اللي كانوا بيصرفوا عليها في سنة 17/18 🤣🤣. *️⃣ اعرف ناس من 17/18 كانت مقضياها فسح وخروجات وسفر لكن دلوقتي بتكافح للحياة؛ فلو هو اتسأل في 2017 كان هيحط انفاق لبند الفسح؛ دلوقتي لو سألوه وحد قاله الفسح هيروح مسمعه الفاظ وأصوات غير حضارية. *️⃣ دي مجرد ملحوظة من فيديو شغال عليه لكن مش هخش فيها بالفيديو عشان مش هدفي أكيد اعتراض علي منهجية البحث بل توضيح ايه بيتم لكن قولت أحكي لكم بس. ⬅️⬅️⬅️ لمحبي القراءة أصحابي وحبايبي؛ أنا مش هتخلى عنكم لصالح الفيديوهات؛ انتم الأصل... فمن الفيديو القادم هكتب الفيديو بوست؛ وبعد كام يوم من نشر الفيديو هنزله لكم مكتوب بحيث محدش يفوته حاجة... لن يجبر احد علي المشاهدة للحصول علي معلومة 🥰. احنا بنواكب الزمن لكن تظل القراءة هي الأساس

النهاردة يوم الفايدة والمركزي مفروض يعلن رقمها الجديد *️⃣ المرادي في انقسام واسع؛ في بنوك توقعت 2% تخفيض وفي 1.75% وفي الطرف الآخر هشام عز العرب CIB توقع تثبيت الفايدة من منطلق نستني نشوف التضخم. *️⃣ بالنسبة لي ك محمد سامي متوقع تخفيض لكن مش واسع يعني مش هنروح ناحية 2% دي؛ يعني ممكن 0.5% أو 1% تخفيض. *️⃣ اه التضخم بيزيد ولسه هيزيد تاني بس في فارق كبير بين معدلات الفايدة الحالية والتضخم فممكن الفارق دا يدينا مرونة 1-2% حركة وأنا ك بن سامي بقول نكتفي ب 1% *️⃣ هو في الظروف التانية كنت بقول إن المركزي بيحب سياسة تاتا خطي العتبة وبرااااحة وهيثبت لكن الشهر الماضي كان شجاع وخفض 2.25%... ولسه الحكومة قايلة إن 1% في الفايدة تساوي 45.8 مليار جنية؛ اه المركزي مستقل عن الحكومة وملوش دعوة بالترليونات اللي عليها بس برضك ضغوط بقى. *️⃣ مفروض مستهدفات التضخم بنهاية 26 تبقي 10% يعني الفايدة مفروض تبقي وقتها نقول 14-15% لو المستهدفات تمت؛ دا لو بقي. *️⃣ يا تري يا هل تري هيرجع لسياسة في التأني السلامة وفي العجلة الندامة ويثبت؛ ولا نكمل طبيعي ونديها 1% تخفيض؛ ولا حبوب الشجاعة ونخش ل 2%... هذا ما سنشاهده اليوم عالمغرب كده.

للاسبوع الثالث نزلت الفيديو الثالث؛ ياااه يا جدعان 🥰🥰 الفيديو دا هيبقي واحد من سلسلة فيديوهات هتتكلم عن التضخم؛ هنشرحه كله من اول هو ايه وبيحسبوه ازاي وهل هو معبر حقيقي عن الغلاء ام لا ووووو دا الفيديو الأول في السلسلة https://youtu.be/qNMG-GzD93k?si=Lk4ELvMLUsJWPaK5

قفزة من 13.9% ل 16.8% للتوضيح التضخم كان متوقع انه طالع في مايو لكن الوتيرة اسرع من المتوقع؛ فمفيش مفاجأة في الصعود لكن نسبة الصعود. محتاج أعمل سلسلة فيديوهات اشرح فيها التضخم وبيتحسب ازاي وتفاصيله.

3 بوستات في بوست واحد... البوست الكومبو 1️⃣ مصر تعقد صفقة غاز ب 15 مليار دولار *️⃣ بلومبيرج أعلنت إن مصر خلاص اتفقت على صفقة استيراد غاز ضخمة بتكلفة تقارب 15 مليار دولار... الصفقة دي عبارة عن 290 شحنة غاز مسال هيوصلوا مصر خلال الفترة من 1 يوليو 25 حتي 31 ديسمبر 27. *️⃣ الصفقة عبارة عن 160 شحنة لسنة ونص اي الفترة حتي نهاية 26 (متوسط شهري 8.89 شحنة) بقيمة 8 مليار دولار ثم سنة 2027 هتكون 130 شحنة (متوسط شهري 10.8 شحنة) تقارب 7 مليار دولار. *️⃣ الصفقة ضخمة مشارك فيها أرامكو و شل وشركة نفط أذربيجان و و Vitol و Trafigura و BGN و Hartree Partners كده نقدر نقول لمدة 2 ونص سنة قادمين ⬅️ عدد 290 سفينة ب 15 مليار دولار. ⬅️ ايجار 3 سفن فك اسالة دائمين و سفينة موسمي سنتين ونص ايجار ب اكثر من نص مليار دولار. ⬅️ الغاز اللي جاي من ولاد العم سنتين ونص ب 5-6 مليار دولار دا لو ضغوطهم لزيادة السعر منجحتش. *️⃣ كده فاتورة الغاز المستورد لعامين ونص تساوي 20+ مليار دولار بخلاف لسه حصة الشريك الاجنبي 50% من الانتاج المصري. *️⃣ الخبر الكويس إن كده هنضمن استقرار الطاقة والكهرباء والمصانع من السنة الجاية مش هتتقطع عنها الغاز وقت الحرارة الشديدة... *️⃣ استقرار الطاقة هيحسن بيئة الاستثمار لان مفيش منطق تروح دولة فيها تخفيف احمال او مصنع بيتقطع عنه الغاز زي الاسمدة عشان تبعت الغاز لمحطات الكهرباء فميحصلش تخفيف أحمال. *️⃣ خبر كويس للصناعة والاستثمارات في مصر وخاصة مع اننا بقينا من ارخص الدول فالتصدير هيزيد كثير الفترة القادمة؛ ويا مسهل نجيب فوائض تعوض اللي بيسحبه الغاز. *️⃣ وطبعا كلامي كله علي الاقتصاد للدولة والشركات؛ اما المواطن فمش محتاج أقولك حاجة... كفاية تحسب ان ثلثي الغاز المستورد دا رايح للكهرباء فتكلفة الكهرباء هتزيد جداً... دا معناه ايه؟ دا معناه استني شهر 9 القادم 😉😉 وافتكرني بس متدعيش عليا بليز مش أنا هزود فاتورتك 😓😓 ————————— 2️⃣ أوديك فين يا هوت ماني *️⃣ إمبارح أمريكا سحبت شوية رعايا من بعض الدول الخليجية؛ دا بيكون بناء على استخبارات نصحت بكده عشان في قلق من ضرب اسرائيل لإيران؛ أهو الاقتصاد برضك عنده اجهزة استخبارات بتاعته؛ مؤسسات عملاقة بتدير مئات المليارات بل بعضها بيدير ترليونات بتعين شبكة مخابرات اقتصادية بتسمى مؤسسات مالية واقتصادية دورها تتوقع الضربات دي برضك وعلى أساسهم بيحركوا الترليونات بتاعتهم دي. *️⃣ دائماً بقول إن أسواق المال هي شبه "سحب الرعايا" اللي أمريكا عملته؛ المخابرات الاقتصادية تدي نصيحة قلق اخرجوا من دول كذا يخرجوا... فاكرين أزمة الدولار في مصر بدأت فبراير 2022 لما طلع قرار الاعتماد المستندي وقفل الاستيراد ثم الفيدرالي زود الفايدة ثم مصر عملت تعويم عيد الأم 21 مارس 2022.. الهوت ماني بقى بدأ يخرج من مصر في أكتوبر 2021 لإنه وصله إن الفيدرالي هيزود الفايدة ودا وحش لدول العالم الثالث فأجري يا مجدي؛ فبدأوا خروج من مصر قبل الفيدرالي يبدأ يرفع الفايدة ب 6 شهور. *️⃣ نفس الشيء دلوقتي وكتبت عنه قبل كده؛ يقولك قلق بين مصر وإسرائيل؛ هننزل مظاهرة؛ هيجبرونا عالتهجير وزعلانين مننا؛ اروح رايح باصص ايه أخبار الهوت ماني؟ شغالين دخول؛ يبقى المؤسسات الكبرى بره مش شايفه إن القلق الحالي مرعب والوضع مستقر ومصر زي الفل. *️⃣ دلوقتي الكلام إن قافلة جايه عشان تخرب مصر... واسرائيل هتضرب إيران عشان تهجر الفلسطيين ييجوا يخربوا مصر.. والحوثي قافل باب المندب عشان يضر الاقتصاد المصري؛ بسيطة خش يا ولدي كده سوق الهوت ماني ايه أخباره الاسبوع دا؟ تلاقي الأجانب زودوا حيازاتهم 800 مليون دولار في 3 أيام؛ ومشتريات العرب النهاردة هي الأعلى من 3 شهور تقريباً. يعني لا العرب قلقانين وخايفين عالاقتصاد ولا الأجانب... أومال الهري عالفيسبوك دا شغال ليه. *️⃣ حيازات الأجانب من سوق الديون المصرية تقارب 40 مليار دولار نصهم ريبو مضمون ونصهم حر طليق لو عاوزين يطلعوا بكره بيه هيطلعوا... طبعاً في نسبة مصريين على فكرة عندهم شركات اجنبية وبيتداولوا في خدمة الديون المصرية لكن الأغلبية أجانب. ⬅️ الخلاصة مفيش قلق ومراهقة بوستات الفيسبوك عن المؤامرات الكونية مش بياكل مع أسواق المال. ومصر أمان والاقتصاد مستقر 2025 ومكمل 2026 استقرار بإذن الله. —————————— 3️⃣ لايف بكره أو بعد بكره *️⃣ الخميس الماضي كان الوقفة وليلة العيد معرفتش أعمل الايف؛ والاسبوعين قبله كان عندي مشغوليات فكنت مخطط إنه يكون النهاردة. *️⃣ بس للأسف عندي دور برد عنيف فمش هقدر أطلع لايف؛ مش هيكون ظريف حد طالع لايف وعمال يعطس كل 5 دقايق ومناديل والجو دا... لو ربنا كرم وتحسنت بكره هعمل بكره الايف وهكتب قبلها؛ لو لا هيكون السبت إن شاء الله. *️⃣ النقاش هيكون عن الاستثمار الأجنبي وليه بنخاف من أي سيرة لاستثمار أجنبي وإزاي الاستثمار الأجنبي مهم لأي اقتصاد وبرضك ازاي الدول بتديره. اشوفكم على خير

كلاكيت كمان مرة *️⃣ هي لو موزمبيق ضايقت أمريكا، تقدر أمريكا تطلع تضرب العاصمة مابوتو بسهولة؛ أمريكا مش هتخاف من موزمبيق ولا هتحط حسابات يمكن غير التكلفة المادية بتاعة الصواريخ. *️⃣ طيب الصين بقى، تقدر أمريكا تطلع تضرب بكين؟ مستحيل، كده حرب شاملة مدمرة لإن الصين قوية، ومحدش يقدر يتحدى حد قوي ويعاديه بسهولة؛ ده أمريكا متقدرش تقول عندنا سفارة في تايوان ومسماها المعهد الأمريكي في تايوان؛ عاوز تعمل ورق يا تايواني؟ روح المعهد الأمريكي... كلمة "سفارة" متتقالش عشان إحنا دولة قوية. *️⃣ فـ كلاكيت كمان مرة؛ بيقولك القافلة دي إسرائيل عاوزاها عشان تستغلها وتضرب مصر... للدرجة دي شايفهم أمريكا وإحنا موزمبيق، فمحدش هيخاف يعاديك. *️⃣ مصر دولة قوية سواء متفق أو مختلف معاهم سياسيًا؛ ففكرة إننا مصرين نروج إننا مهزقين، وعادي مش خايفين يضربونا... دي إهانة لمصر يا عباقرة... ده إنت لو عملت إيه برضك محدش هيخش معاك في حرب؛ المشاكل بس كبيرها تديهم بنط في المفاوضات يعني نظام "يصح اللي عملتوه ده؛ صالحونا بقى"... لكن حرب؟ كده إنت بتقلل من نفسك قوي قوي... الموضوع كله مفاوضات، وكل طرف هدفه ياخد كروت تقوي موقفه في التفاوض، بس كده. ضغط بالغاز، أو ضغط بصندوق النقد؛ لكن حرب؟ عيب قوي قوي تقللنا لكده، عييييب. *️⃣ المشكلة إن فيلم "أصل إسرائيل هتستغل كذا عشان تضربنا، عشان تحاربنا، عشان مش عارف إيه"؛ اتعمل عشرميت مرة، ولا حصل أي حاجة... ده إيه الملل ده!

الصورة دي تضم 4 سفن مفروض تهم المصريين وبالترتيب 1️⃣ من فوق السفينة Barcarole المعروفة حالياً باسم السفينة مادلين لفك الحصار. ودي أهم سفينة فيهم لإنها لناس مش لاقية تاكل. 2️⃣تحتها في اسكندرية السفينة Energos Power ودي سفينة فك الاسالة الأمريكية اللي جت من ألمانيا ووصلت ميناء اسكندرية يوم 25 مايو بيتعمل لها شوية صيانات وبعدين تدخل الخدمة في فك الاسالة مفروض الشهر القادم إن شاء الله. 3️⃣ تحت على خليج السويس جهة اليمين عند سيناء السفينة Energos Eskimo ودي سفينة فك الاسالة اللي كانت عند الأردن ومصر مضت معاها عقد لغاية 2035 وهي خلصت مهمتها في العقبة وجت أهي منتظره إننا نخلص تظبيط مكان ليها في ميناء السوميد أو سونكر بحيث تخش تشتغل هي كمان في فك الإسالة بعد ما تخلص الصيانة الروتينية. 4️⃣اللي شايله مصر السفينة Hoegh Galleon اللي معانا بقالها سنة وشغالة بلا توقف صيف شتاء... خلاص بقى بتخلص شغلها وبداية 2026 هتطلع على أستراليا وغالباً هنشوف سفينة تانية مكانها أو سفينة رابعة ودي غير الخامسة التركية اللي بتلم شنطها وهتتحرك لميناء دمياط الشهر القادم إن شاء الله ودي هتكون سفينة تروح تركيا في الشتاء وتيجي مصر في الصيف

بهدوء كده نزلت النهاردة الصبح ثاني فيديو تجريبي ليا 🫣🫣 ⬅️ عملت شوية تحسنات بالصوت وجربت اعدل الخلفية؛ واتشاف الفيديو 3 الاف مرة 😁 *️⃣ الفيديو بيتكلم عن حاجة كنت شرحتها قبل كده وهي نقطة تحويل الاجور بين الدول؛ يعني لو بتقبض في مصر 25 الاف جنية وجالة عرض شغل بالخليج 8 الاف درهم فيا تري دا يكافئ كام في مصر... ⬅️ المرة دي هستخدم داتا من صندوق النقد الدولي عشان تحول الرواتب بحيلة كده. ⬅️⬅️⬅️ هسبقكم واتريق علي نفسي؛ غالبا أنا كنت عايش سنة 2030 وكتبت في الفيديو سعر الصرف للريال 25 جنية 🤣 شكل عقلي الباطن قال يسبق الزمن 🫣🫣🫣 عالعموم الفيديو اهو https://youtu.be/2mKj_mZYScQ?si=C6VjayNVObjiRV13