س: بكرة امتحان مادة الدين، وبصراحة يعني أنا مش بهتم بيها ولا بمذاكرتها عشان برا المجموع، وناوي النهارده كده بالليل هقعد احفظ الكلمتين اللي ينجحوني وخلاص! أنا كده غلطان؟ ج: خليني الأول أقولك إن أنا متفهم إنك في المرحلة دي بتهتم بالمواد اللي داخلة في المجموع، وإن الوقت ضيق والمذاكرة كتير.. ربنا يعينك ويقويك! ولكن.. خليني بردو أقولك إن لما نتكلم عن مادة الدين لازم نوقرها ونتكلم عنها باحترام وأدب؛ لأن المادة دي يكفيها شرفًا إن فيها قال الله، وقال رسول الله ﷺ. تاني حاجة عايز أقولهالك إنك بشكل عام لازم تتعلم دينك؛ عشان تعرف تعبد ربنا صح. وحتى لو كانت برا المجموع في الدنيا، فالدين هو أساس نجاحك وفوزك في الآخرة فخليك حريص أول ما تخلص امتحاناتك تلتحق ببرنامج علمي موثوق فيه على أرض الواقع أو أونلاين تتعلم فيه أساسيات دينك. وكمان تلتحق بدار تتعلم فيه إزاي تقرأ قرآن صح وتحفظ منه اللي تقدر عليه. وآخر حاجة عايز أقولهالك، إوعى بكره بعد ما تطلع من اللجنة ترمي ورق الدين اللي كنت بتذاكر منه في الشارع! الورق ده فيه آيات قرآنية وفيه لفظ الجلالة، حرام ترميه وتهينه وتسيبه في الأرض الناس تدوس عليه! يالا روح شوف اللي وراك.. مش هطول عليك أكتر من كده. #س_ج_ليالي_الامتحان