المنافق دايمًا فاكر نفسه أذكى واحد.. فاكر إنه بيلف ويدور من غير ما حد يحس، وإنه بيقول الكلام اللي الناس عايزه تسمعه، وبيمثل الدور اللي يناسب كل موقف، ويعيش مطمن إن كله ماشي على مزاجه. بس الحقيقة؟ الناس واخدة بالها، شايفاه وبتقرأه كويس جدًا، بس ساكتين… مش لأنهم مصدقينه، لأ، لأنهم مش حابين يكشفوه… لسه. إنما السؤال الجد: هو المنافق دا… عارف إنه منافق؟ فيه نوع عارف ومتقبل نفسه، شايف إن النفاق "شطارة" وإنه لازم يبقى عنده وشوش كتير علشان يعرف يعيش. النوع ده خطر… لإنه ماعندوش مشكلة يبيعك وهو بيبتسم، ويخونك وهو بيواسيك. وفيه نوع بيقنع نفسه إنه مش بيخدع حد، وإنه بس بيجامل أو بيحاول "يمشي الدنيا"، بس هو في الحقيقة عنده وش لكل مناسبة، ومايقدرش يواجه نفسه بالحقيقة. أما النوع اللي بيخوف بجد؟ اللي بيصدق كذبه… عايش دور الضحية، شايف إن كل تصرف بيعمله له مبرر، وإن الناس هي اللي مش فاهمه أو مش مقدراه، مع إنه أكتر حد بيأذيهم، بس مش قادر يشوف ده… لأنه غرقان في تمثيله. المشكلة مش إنك تتعامل مع منافق، المشكلة إنك تصدقه، وتنسى إن الوشوش بتتكشف مهما طال الوقت. 🖤