مسجد اقصى کی بندش: مسلسل دوسرے جمعہ کو بھی عبادت گزار محروم 🗓 رپورٹ: جمعہ، 20 جون 2025ء 📍 القدس الشريف: قابض اسرائیلی انتظامیہ کے ظلم و جبر کا سلسلہ جاری ہے، اور آج مسلسل دوسرے جمعے کو بھی قبلۂ اول، مسجد اقصى المبارک کے دروازے بند کر دیے گئے اور بہت ہی محدود گنے چنے نمازیوں کو ہی جمعہ کےلئے جانے دیا گیا۔ عینی شاہدین اور ذرائع ابلاغ کے مطابق، اسرائیلی پولیس کے افسر الاخ تلال کی نگرانی میں مسجد اقصیٰ کے تمام اہم داخلی راستے بند کر دیے گئے اور فلسطینی نمازیوں کو مسجد تک رسائی سے سختی سے روکا گیا۔ جمعہ کی نماز کے لئے دور دراز سے آنے والے ہزاروں فلسطینی مرد و خواتین کو زبردستی واپس بھیجا گیا، جب کہ مسجد کے اطراف میں بڑی تعداد میں اسرائیلی فوج تعینات رہی۔ یہ اقدام نہ صرف عبادت کی آزادی کی کھلی خلاف ورزی ہے بلکہ عالمی انسانی حقوق کی پامالی بھی ہے۔ 📢 مقامی شہریوں اور انسانی حقوق کی تنظیموں نے اس اقدام کو "مذہبی دہشت گردی" قرار دیتے ہوئے عالمی برادری سے فوری مداخلت کا مطالبہ کیا ہے۔ مسلسل دوسرے جمعے نمازیوں کو مسجد اقصیٰ سے روکا جانا نہایت خطرناک اور تشویشناک رجحان ہے، جو نہ صرف مسلمانوں کے جذبات مجروح کر رہا ہے بلکہ علاقے میں کشیدگی کو بھی بڑھا رہا ہے۔ 📌 واضح رہے کہ مسجد اقصیٰ صرف فلسطینیوں کے لیے نہیں، بلکہ پوری امت مسلمہ کا مشترکہ دینی ورثہ ہے، اور اس کے خلاف ہونے والی کوئی بھی جارحیت پوری دنیا کے مسلمانوں کے دلوں کو زخمی کرتی ہے۔ محمد احمد صارم