د ١٤٠٤ کال کانکور ازموینې دویم دور د هېواد په ١٢ ولایتونو کې په بریالیتوب سره پای ته ورسېد. د ازموینو ملي ادارې مسؤولینو او ممتحن پلاوو په ذکر شویو ولایتونو کې د ازموینې پروسې د ښه مدیریت، نظم، روڼتیا او په ازموینه کې د ځوانانو د پراخه ګډون څخه ډاډ ورکړ او د کانکور روان بهیر یې خورا بریالی وباله. د ازموینو ملي ادارې مشرتابه پلاوي هم د ازموینې څخه د نظارت په موخه ننګرهار، لغمان، کندهار او نورو بېلابېلو ولایتونو ته سفرونه وکړل او پروسه یې له نږدې نظارت کړه. د ١٤٠٤ کال کانکور ازموینې په دویم دور کې ننګرهار، لغمان، نورستان، کنړ، ارزګان، هلمند، کندهار، زابل، فراه، نیمروز، پکتیا او خوست ولایتونه شامل وو. د کانکور ازموینې درېیم دور کې بدخشان، تخار، کندز، بلخ سمنګان، جوزجان، سرپل، هرات، بادغیس او فاریاب ولایتونه شامل دي چې راتلونکې اونۍ به په کې د بایومتریک معلوماتو ثبت پروسه پیل شي.