ھزدار ،پنجگور، مستونگ ءُ جیکب آباد ءَ جتائیں ویلاں پنچ مردم بیران ءُ یکے ٹپی دوشمبے، 16 جون 2025، زرمبش بلوچی ھزدار | پنجگور | مستونگ | جیکب آباد: جتا جتائیں ویلاں پولیس کارمندے ءَ ھوار چار مردم بیران بیتگ ءُ یک تیرسپتگیں لاشے دزکپتگ. بنشون ءِ ھزدار ءِ ھند کرک پیر ابراھیم ءَ پجار نه بیتگیں سلاه بندیں مردماں تیرگواری کرتگ ءُ دو مردم کشتگ. کشگ بیتگیں مردم سرکاری وانگجاه ءِ استاد گلزار ساسولی ءُ آئی ءِ ھمراه ھامد اھمد اِنت که سلاه بندیں مردماں ھما وھد ءَ نشانگ کرتگ انت آ گوں پرپٹ ءَ روگ ءَ بیتگ اَنت. کشگ بیتگیں گلزار ساسولی ءِ بابت ءَ انچش گوشگ بوگ ءَ اِنت که چه ایشی ءَ ھم سلاه بندیں مردماں نشانگ کرتگ بلے رک اِتگ. آیانی کوش ءِ سوب انگت زانگ نه بیتگ. ھمے وڑ ءَ ھزدار ءِ ھند زھری ، نورگامه ءَ گیٹ وے ءِ نزیک ءَ مردمے تیرسپتگیں لاشے دزکپتگ. کشگ بیتگیں مردم انگت پجارگ نه بیتگ. آئی ءِ لاش په ھژدری چار ءُ ٹپاس ءَ نادراھجاه ءَ برگ بیتگ. چه ایشی ءَ ابید جیکب آباد ءَ سلاه بندیں مردماں تیرگواری کرتگ ءُ میرپور برڑو پولیس تھانه ءِ ایس ایچ او نزیر اھمد چانڈیو کشتگ. ھمے وڑ ءَ مستونگ ءَ ولی ھان تھانه ءِ نزیک ءَ سلاه بندیں مردماں تیرگواری کرتگ ءُ مردمے کشتگ. بیران بیتگیں مردم ءِ نام منیر اھمد ء ھدابکش اِنت ءُ آ پڑنگ آباد ءِ جاه منند اِنت. آئی ءِ لاش په ھژدرء چار ءُ ٹپاس ءَ نادراهجاه ءَ برگ ءَ پد کھول ءِ دست ءَ دیگ بیتگ. آئی ءِ کوش ءِ سوب انگت زانگ نه بیتگ. چه ایشی ءَ اَبید پنجگور ءَ چتکان بازار ءَ گریب آباد وانگجاه ءِ نزیک ءَ پجار نه بیتگیں سلاه بندیں مردمانی تیرگواری ءَ پولیس سروگان پزیر اھمد سکا ٹپی بیتگ، ٹپی بیتگیں پولیس سروگان گوں ناگیگیں جاوراں په الاج ءَ نادراهجاه ءَ دیم دیگ بیتگ. https://t.me/zrumbesh/30778