*دل بدلتے ہیں جب قرآن بولتا ہے۔* قرآن فقط الفاظ کا مجموعہ نہیں، یہ دلوں کی دھڑکن، روحوں کی صدا، اور ضمیروں کی بیداری کا نسخۂ کیمیا ہے۔ جب انسان اس ربانی کلام کو صرف تلاوت کی زینت نہیں، بلکہ فہم و تدبر کی روشنی میں اپنے دل پر اتارتا ہے، تو ایسا معلوم ہوتا ہے جیسے دل کے بند دریچے کھلنے لگے ہوں، سینہ نور سے بھرنے لگا ہو، اور آنکھوں سے وہ آنسو ٹپکنے لگے ہوں جو برسوں کی غفلت کی گرد کو دھو دیتے ہیں۔ یہ قرآن… ہاں یہی قرآن، جس کے سامنے بڑے بڑے جابر لرز اٹھے، جس نے عرب کے ریگستانوں میں انقلاب کی لَہر دوڑا دی، وہ آج بھی ویسی ہی تاثیر رکھتا ہے، مگر شرط یہ ہے کہ اسے دل سے پڑھا جائے، عقل سے سمجھا جائے، اور روح سے قبول کیا جائے۔ جب دل بدلتے ہیں تو نیتیں نکھرتی ہیں، جب نیتیں خالص ہو جائیں تو اعمال سنور جاتے ہیں، اور جب اعمال سنوریں تو زندگی میں وہ سکون اترتا ہے جسے دنیا کی کوئی دولت، کوئی طاقت، کوئی سلطنت نہیں دے سکتی۔ اللہ کی رضا جب مقصود بن جائے، تو بندہ اپنے عمل کو بازارِ ریا سے نکال کر محرابِ اخلاص میں لے آتا ہے۔ پھر وہ سجدہ کرتا ہے، مگر وہ سجدہ صرف زمین پر ماتھا رکھنے کا عمل نہیں ہوتا، بلکہ وہ سجدہ، نفس کی گردن توڑنے کا اعلان ہوتا ہے! قرآن کا دامن تھام لو، دل کا صحرا گلزار بن جائے گا… اور جس کے دل میں اللہ کی محبت جاگ جائے، وہ پھر دنیا کے ہر خوف سے آزاد ہو جاتا ہے۔ 𓂆 مسلم فورم 𓂆 https://whatsapp.com/channel/0029VadYVUE23n3hs4MgIh2H