حرمِ علم کے چراغ کو بجھانے والوں کی شناخت ہوگئی اکوڑہ خٹک کی پُراسرار فضا میں ابھی تک وہ لمحے گونج رہے ہیں، جب 28 فروری 2025 کو دارالعلوم حقانیہ کی جامع مسجد میں، نمازِ جمعہ کے بعد، ایک لرزہ خیز خودکش دھماکے نے علم و حکمت کے ایک درخشندہ چراغ، مولانا حامد الحق حقانیؒ کو شہادت کے درجے پر فائز کر دیا۔ اس سانحے میں مولانا سمیت آٹھ نفوسِ قدسیہ نے جامِ شہادت نوش کیا۔ اب، کچھ مہینوں کی خاموش لیکن پُرجوش تفتیش کے بعد، تحقیقاتی ادارے اس المناک حملے کے پسِ پردہ چہروں کو بے نقاب کرنے میں کامیاب ہو چکے ہیں۔ معتبر سرکاری ذرائع کے مطابق، اس عظیم سانحے کی جامع رپورٹ وزیرِاعظم شہباز شریف کو ارسال کر دی گئی ہے، جس میں انکشاف کیا گیا ہے کہ ایک عالمی دہشت گرد تنظیم، دو دشمن ملکوں کی خفیہ ایجنسیوں کی معاونت سے، اس ناپاک حملے کی منصوبہ ساز نکلی۔ رپورٹ میں یہ ہوش ربا انکشاف بھی شامل ہے کہ خودکش حملہ آور ایک غیر ملکی تھا، جو خارجی دروازے سے مدرسے میں داخل ہوا، اور یوں علم و عرفان کے مرکز کو لہو میں نہلا گیا۔ انسپکٹر جنرل خیبرپختونخوا، ذوالفقار حمید کے مطابق، تفتیش اپنے حتمی مراحل میں داخل ہو چکی ہے اور وہ خفیہ ہاتھ، جنہوں نے اس ناپاک منصوبے کو ترتیب دیا، اب اداروں کی گرفت میں ہیں۔ یہ سانحہ صرف ایک فرد پر حملہ نہ تھا، یہ علم، امن، دین اور تہذیب پر حملہ تھا۔ لیکن تاریخ گواہ ہے کہ شہداء کے لہو سے چراغ بجھتے نہیں، مزید روشن ہو جاتے ہیں۔ مولانا حامد الحقؒ کی شہادت نے حقانیہ کی گلیوں میں اک نیا عزم جگا دیا ہے— علم کا قافلہ رکے گا نہیں، بلکہ اور بلند ہوگا۔ 𓂆 مسلم فورم 𓂆 https://whatsapp.com/channel/0029VadYVUE23n3hs4MgIh2H