17-6-2025 ಮಂಗಳವಾರದ ಹವಾಮಾನ ಮುನ್ಸೂಚನೆ. ಕರಾವಳಿ ಮಲೆನಾಡು ಜಿಲ್ಲೆಗಳಲ್ಲಿ ನಿನ್ನೆ ನಿರಂತರ ಮಳೆಯಾಗಿದ್ದು ಹೆಚ್ಚಿನ ಪ್ರದೇಶಗಳಲ್ಲಿ ಭಾರಿ ಮಳೆಯಾಗಿದೆ. ಒಳನಾಡು ಜಿಲ್ಲೆಗಳಲ್ಲಿ ಮಳೆ ಕಡಿಮೆ ಆಗಲು ಪ್ರಾರಂಭವಾಗಿದ್ದು ಅಲ್ಲಲ್ಲಿ ಸಾಮಾನ್ಯ ಮಳೆಯಾಗಿದೆ. ಇವತ್ತಿನ ಮುನ್ಸೂಚನೆ ಪ್ರಕಾರ ಕಾಸರಗೋಡು ದ.ಕ ಉಡುಪಿ ಜಿಲ್ಲೆಗಳಲ್ಲಿ ಹಗಲು ನಿರಂತರ ಮಳೆ ಮುಂದುವರೆಯಲಿದೆ. ಕಾಸರಗೋಡು ದ.ಕ. ಜಿಲ್ಲೆಗಳಾದ್ಯಂತ ಬೆಳಿಗ್ಗೆಯಿಂದ ಉತ್ತಮ ಮಳೆಯಾಗುತ್ತಿದೆ. ಉ.ಕ ಕರಾವಳಿ ತೀರ ಪ್ರದೇಶಗಳಲ್ಲಿಯೂ ಉತ್ತಮ ಮಳೆಯ ಮುನ್ಸೂಚನೆ ಇದೆ. ಉಳಿದ ಪ್ರದೇಶಗಳಲ್ಲಿ ಸಾಮಾನ್ಯ ಮಳೆ ಮುನ್ಸೂಚನೆ ಇದೆ. ಗುಜರಾತ್ ಮತ್ತು ಪ. ಬಂಗಾಲದಲ್ಲಿ ಏರ್ ಸರ್ಕ್ಯುಲೇಷನ್ ಗಳು ಇನ್ನೂ ದುರ್ಬಲ ಆಗದೇ ಇರುವುದರಿಂದ ಇವತ್ತು ಹಗಲು ಅಧಿಕ ಮಳೆ ಬರುತ್ತಿದ್ದು ನಾಳೆಯಿಂದ ಮಳೆ ಪ್ರಮಾಣ ಕಡಿಮೆ ಆಗಲು ಆರಂಭವಾಗಬಹುದು. ಆದರೇ ಕರಾವಳಿ ಜಿಲ್ಲೆಗಳಲ್ಲಿ ಸಾಮಾನ್ಯ ಮಳೆ ಜೂನ್ 25 ತನಕ ಮುಂದುವರೆಯಲಿದೆ. ಮಲೆನಾಡಿನ ಕೊಡಗು ಹಾಸನ ಚಿಕ್ಕಮಗಳೂರು ಶಿವಮೊಗ್ಗ ಜಿಲ್ಲೆಗಳಲ್ಲಿ ಸಾಧಾರಣ ಮಳೆ ಇವತ್ತು ಮುಂದುವರೆಯಲಿದೆ. ಕರಾವಳಿ ಗಡಿಗೆ ಹೊಂದಿಕೊಂಡಿರುವ ಘಟ್ಟಪ್ರದೇಶಗಳಲ್ಲಿ ಉತ್ತಮ ಮಳೆಯಾಗಬಹುದು. ಮಲೆನಾಡಿನಲ್ಲಿ ಭಾರಿ ಮಳೆ ನಾಳೆಯಿಂದ ಕಡಿಮೆ ಆದರೂ ಸಾಮಾನ್ಯ ಮಳೆ ಒಂದು ವಾರ ಮುಂದುವರೆಯಬಹುದು. ದಕ್ಷಿಣ ಒಳನಾಡಿನಲ್ಲಿ ನಾಳೆಯಿಂದ ದೊಡ್ಡ ಮಳೆಗಳು ಕಡಿಮೆ ಆಗಿ ಮೋಡ -ಬಿಸಿಲು ಆರಂಭವಾಗುವ ಸಾಧ್ಯತೆಗಳಿವೆ. ಇವತ್ತು ಮೈಸೂರು ಮಂಡ್ಯ ಬೆಂಗಳೂರು - ಗ್ರಾಮಾಂತರ ತುಮಕೂರು ಚಿಕ್ಕಬಳ್ಳಾಪುರ ದಾವಣಗೆರೆ ಜಿಲ್ಲೆಗಳ ಅಲ್ಲಲ್ಲಿ ಸಾಮಾನ್ಯ ಮಳೆಯ ಸಾಧ್ಯತೆ ಇದೆ. ಉತ್ತರ ಒಳನಾಡಿನ ಬೆಳಗಾವಿ ಜಿಲ್ಲೆಯಲ್ಲಿ ಸಾಧಾರಣ ಮಳೆಯ ಮುನ್ಸೂಚನೆ ಇದೆ. ಧಾರವಾಡ ಗದಗ ಹಾವೇರಿ ಜಿಲ್ಲೆಗಳ ಅಲ್ಲಲ್ಲಿ ಮಳೆಯಾಗಬಹುದು. ಉಳಿದ ಜಿಲ್ಲೆಗಳಲ್ಲಿ ಮೋಡದ ವಾತಾವರಣ ಮುಂದುವರೆಯಲಿದೆ. ಬೆಳಗಾವಿ ಧಾರವಾಡ ಜಿಲ್ಲೆ ಹೊರತುಪಡಿಸಿ ಉಳಿದ ಜಿಲ್ಲೆಗಳಲ್ಲಿ ನಾಳೆಯಿಂದ ಮಳೆ ಕಡಿಮೆ ಆಗಬಹುದು. ಗುಜರಾತ್ ನ ಗಾಳಿಯ ತಿರುಗುವಿಕೆ ನಾಳೆ ಉತ್ತರಕ್ಕೆ ಚಲಿಸಿ ಶಿಥಿಲ ಆಗಬಹುದು. *ಪಶ್ಚಿಮ ಬಂಗಾಳದಲ್ಲಿರುವ ಸೈಕ್ಲೋನಿಕ್ ಏರ್ ಸರ್ಕುಲೇಷನ್ ಪ್ರಭಾವ ಜೂನ್ 19 ತನಕ ಮುಂದುವರೆಯಲಿದ್ದು ಇದರ ಪ್ರಭಾವದಿಂದ ಕೇರಳ ಕರ್ನಾಟಕ ಕರಾವಳಿ ಮಲೆನಾಡಿನಲ್ಲಿ ಮೋಡದ ವಾತಾವರಣ ಸಾಧಾರಣ ಮಳೆ ಮುಂದುವರೆಯಬಹುದು* . ನಂತರ ಸಾಮಾನ್ಯ ಮುಂಗಾರು ಕರಾವಳಿಯಲ್ಲಿ ಮುಂದುವರೆದರೂ ಒಳನಾಡು ಜಿಲ್ಲೆಗಳಲ್ಲಿ ಮಳೆ ಬಹುತೇಕ ಕಡಿಮೆ ಆಗಿ ಬಿಸಿಲು ಬರಬಹುದು.