یُوں وحشتِ رُخصت میں نہ اِس دِل کو رکھا جائے جانا ہے کسی کو ــــــ تو اچانک ہی چلا جائے پیوند کہاں تک لگیں اب خرقۂ غم کو اِس پوشش رُسوائی کو تبدیل کیا جائے اب بخیہ گروں میں یہی آئینِ رفو ہے جو زخم سِیا جائے ، ادُھورا ہی سِیا جائے اِک چادرِ دِلداری ہے اِس طرح سے مُجھ پر تن ہے کہ اُلجھتا رہے ، سَر ہے کہ کُھلا جائے سب کیلئے جاری ہے تو اے حُسنِ جہانگیر اِس بار غریبوں سے بھی انصاف کیا جائے ہیں سُرخ قبا اِتنے کہ مُشکل میں صَبا ہے تزئینِ گُلستاں کیلئے ،،، کِس کو چُنا جائے سمجھوتہ ہے ، تو اشکِ ندامت سے رقم ہو اعلانِ بغاوت ہے تو پھر خُوں سے لِکھا جائے اے گردشِ دَوراں ـــــــ تِرے احسان بہت ہیں کُچھ دیر تِرے ساتھ بھی اب رقص کِیا جائے (خوشبوؤں کی شاعرہ) پروینؔ شاکر ¹⁹⁹⁴-¹⁹⁵² مجموعۂ کلام : (انکار)