يوميات فتاة ثلاثينية

يوميات فتاة ثلاثينية

6/13/2025, 11:04:18 AM

النهاردة كنت قاعدة بتفرج على السوشيال ميديا وبسأل هو في جيه (بصوت أسماء جلال في مسلسل اشغال شقة)، بيني بلو (خليني ساكتة) ، وألبوم سابرينا كاربنتر الجديد :/ خليني أقولك اللي بيحصل في دماغي: كبرنا على إننا نطالب بالاحترام، نكسر الصور النمطية، نقول لأ لأي حاجة تخلينا نبان سطحيات أو ضعيفات. ولما واحدة زي بيني تظهر تاني بمحتوى… “مناقض تمامًا” لكل اللي حاربناه عشانه، بتحسي إننا بنتراجع تاني كأننا كنا بنجري في نفس المكان. هل ده معناه إن البنات مالهمش حرية يكونوا “كيوت” و”فليرتي”؟ لأ طبعًا. بس امتى الـ”كيوت” ده يبقى اختيار؟ وامتى يبقى وسيلة للقبول والنجاح؟ وإحنا فين من ده كله؟ إحنا اللي بنشتغل ونتعب ونتكلم بوعي كل يوم عشان نقنع العالم إننا مش لازم نكون سلعة عشان نتحب؟ الفكرة مش في بيني أو سابرينا… الفكرة إنك كل يوم بتصحى تسألي نفسك: هل أكون قوية ومتفهمة عشان أحترم؟ ولا أكون كيوت ومثيرة عشان أتحب؟ القوة الحقيقة مش إنك تختاري تكوني كيوت أو قوية… القوة الحقيقة إنك تبقي حرة في الاختيار من غير ما حد يساومك على الاحترام ولا يختزل قيمتك في شكل أو ستايل إنتي مش في سباق لإثبات نفسك قدام تريندات مؤقتة إنتي في رحلة… رحلة لخلق صورة جديدة للأنوثة: أنوثة مش بتعتذر عن ذكاءها ومش بتخجل من دلالها ومش بتقلل من طموحها عشان حد ما يخافش منها. فـ النهاردة، لو لقيتي نفسك حاسة بارتباك أو غيرة أو شك… خدي نفس وفكري إننا بنعيش في زمن الاختيارات المعقدة بس كمان… في زمن النساء الواعيات اللي زيك 💖

يوميات فتاة ثلاثينية

6/15/2025, 7:01:04 PM

أكتر حاجة بتوحشني بعد أي سفر؟ مش البحر… ولا فضول اكتشاف مكان جديد اللي بيوحشني هو عدم التفكير في حاجة، اللي هو اكبر حاجة يشيل همها هو اني الحق بوفيه الفطار بتاع الأوتيل. ان دماغي تبقى طافية مش محتاجة تشتغل مش محتاجة تفكر وأول م ارجع لازم ارجع اشغل دماغي تاني، أفكر في كل حاجة، احسب كل حاجة كئيبة أو واقعية… معرفش بس اللي اعرفوا اني من دلوقتي هرتب لسفرتي الجاية

يوميات فتاة ثلاثينية

5/30/2025, 11:31:03 AM

“أنا مش متأخرة، أنا وصلت بس بطريقة مختلفة. مش كل بنت ثلاثينية متجوزتش معناها إنها فشلت، ومش كل بنت ركزت على شغلها معناها إنها نسيت الحب. إحنا جيل اتحط بين مفترق طرق: نلحق أحلامنا ولا نرضي المجتمع؟ نعيش الحب اللي في خيالنا ولا نستسلم للي فاضل؟ أنا مش بشتكي… بس أنا تعبت. تعبت من الأسئلة، من المقارنات، من نظرات الشفقة، من الوحدة اللي مش دايمًا فيها “أنا قوية”… ثلاثينيتي مش أزمة، هي بداية نضج، بس كمان فيها لحظات خوف… لحظات بصحى فيها وأسأل: هل في حاجة غلط؟ بس الحقيقة؟ أنا بنت، لسه بتحلم، ولسه عندها حب كتير، ولسه قادرة تبني حياة عظيمة… بس محتاجة الناس تشوفني، تفهمني، وتسمعني من غير ما تحطني في قالب جاهز. لكل بنت حاسة بنفس المشاعر: إنتِ مش لوحدك. وأنا هنا، بحكيلك، عشان نطبطب على بعض، ولو بكلمة.”

يوميات فتاة ثلاثينية

6/4/2025, 7:42:43 AM

عارفة الإحساس اللي مش اكتئاب بس مش سعادة؟ مش زهقانة بس مش طايقة حاجة؟ اللي هو حرفيًا لو حد قالي “مالك؟” هقوله: والله ما عرف، بس حسيت لو قعدت في أوضة ضلمة من غير صوت يمكن أرتاح 😭 مش عايزة أخرج، مش عايزة أشتغل، مش عايزة أحب، أنا حتى ماسك الشعر مش قادرة أعمله 😩 كل اللي عايزاه: زر “mute” للحياة… وواحد كمان لجوا دماغي 🙃 وبعدين تيجي اللحظة اللي تفتكري فيها إنك مش لوحدك… “بنات ٣٠ وإحنا مش فاهمين إحنا عايزين إيه” 🤝😂 فاللي عايزة أقوله… لو إنتي حاسة بكده، عادي هو مش طبيعي بس واضح إنه طبيعي عندنا 💅 اشربي شوية ميه، وسيبي التوقعات، وخلينا نعدّي اليوم… وخلاص 🫠

يوميات فتاة ثلاثينية

6/5/2025, 12:35:27 PM

النهاردة عايزة أتكلم عن السرعة… كل حاجة بقت بتحصل بسرعة. العلاقات بتبدأ بسرعة وتخلص أسرع. الشغل عايزك تردي على الإيميل قبل ما تتنفسي. السوشيال ميديا عايزاكي funny، productive، ومصورة كوباية القهوة… في نفس الثانية ☕️📸 حتى دماغنا بقى بيجري أكتر ما بيمشي. بس المشكلة مش في السرعة نفسها… المشكلة إننا مش بندي نفسنا وقت نستوعب. نفرح براحتنا، نزعل براحتنا، نشتاق براحتنا. بقينا بندوس skip على اللحظات، كأننا بنتفرج على حياتنا بسرعات مختلفة، ومفيش وقت نعيش المشهد نفسه. لو حسيتي إنك تايهة وسط كل ده؟ خدي نفس. واقفي شوية. أنتي مش متأخرة… أنتي بس ماشية بسرعة تناسبك.

يوميات فتاة ثلاثينية

6/10/2025, 5:32:04 PM

أوقات كتير بنفكر إن النضج يعني إنك تبقي ماشية بحِكمة… بس الحقيقة؟ النضج = إنك بتتشلّي يوميًا، بتتحرقي ، بتتعاملي مع استفزازات… لكن ماينفعش تنهاري. يعني ببساطة: بتولعي من جوّا بس مش مسموح يظهر ده على وشك أنا عن نفسي، بقيت أطبّق مبدأ بحبه، واسمه: بـهـم. ب = باردة. رد فعلك أهم من الحدث نفسه. مش كل كلمة تردي عليها. هـ = هادية. خليكي هادية، مش من باب الإيجابية… من باب إنك عارفة إن أي انفجار مش هيفيد، غير إنه هيتحسب عليكي مش عليهم. م = متماسكة. مش هتلاقي اللي يشيلك كل مرة، فشدي ضهرك . اللي بيشوفك منهارة مش هيسندك، هيصغّرك. احنا كبرنا، وعدد المرات اللي بنقول فيها “مش فارقة” زاد، مش عشان مش فارقة، بس عشان مفيش رفاهية الانهيار كل شوية وآه، ده مش معناه إننا مش بنضعف. بس بلاش كل انهيار يبقى علني. تعاملي بمبدأ: إحساسي ف قلبي… وتعبي مش باين. وبـهـم